Oté

Konm in patoi déor i di : « In z’irondèl i fé pa lo printan »

Justin / 1 févrié 2011

Somenn dernyèr, la ministrèz Roselyne Bachelot la vni pou mète madam Denise Hong-Hoc-Cheong konm diréktris la Zénès-é-léspor. Bravo pou madam-la, é ni souète aèl fé avans in pé lé shoz issi, dann son fonksyon. Sirtou ké, i paré sé la promyèr foi in Rényonèz i okip in post konmsa La Rényon. Sa sé sak moin la lir dann zournal, mé mi koné pa si lé vré pou vréman. Touléka, sak mi koné, sé k’bann Rényoné dann in post gran fonksyonèr, shé nou, sa lé rar konm korn lapin.
Pétète in désizyon konmsa, sé in l’aplikasyon sobatkoz méssyé Sarkozy la fé lo sis novanm 2009. Mé, sanm pou moin, sa lé konm in goute dolo dann l’oséan ! Zot i koné koman lé shoz i éspass. Bann minis la lès lo prézidan kozé — "Shant ton konte, domin ta fète !" — épi shakinn la arfé konm li té i fé avan. Sa lé bien vré ! Na poin si tèlman lontan, la ministrèz lé z’outré-mer la pa nonm dé moun déor pou, soidizan, mète an plas in lékonomi andozène ! Sirtou, d’apré sak i paré, pou konkirans bann péi loséan indien dépi La Rényon, é gingn in kartyé d’marshé an plis, pa pou nou, mé pou zot la-ba dann la France.
Arzout èk sa, shak rantré l’ékol, nana sis-san amontrèr i sorte la-ba pou fé lékol issi, é bann l’amontrèr issi, i anvoy azot la-ba an éstaz. Mi rèv oir in zour in tronbinoskop bann gran vaza La Rényon, bann vaza séktèr piblik, konm vaza séktèr privé. Moin lé pa sir nora, anparmi, in bonpé pou fé koulèr lokal. Pé s’fèr moin lé pa dann lo vré, mé sé konmsa mi santi lé shoz.
Tout fason, nou n’ora l’okazyon ar-koz la-dsi, mé an atandan, mi souète la nouvèl diréktris Zénès-é-l’éspor in bon réissit... san oubli fé la romark konm in patoi déor i di : « In z’irondèl i fé pa lo printan ».

 Justin 


Kanalreunion.com