Oté

Konm in shyin dan l’arozoir !

Justin / 12 févrié 2010

Oplis mi rapèl sak lo prézidan la Répiblik la di dann son kozman lo sis novanm dé mil nèf, oplis mi ropass dann mon tète lo film li la tourné la-ba Pyèr-fon, sansa Tanpon, sansa ankor Sinn-ni trojour-la... moin la anvi dir, sé sa mèm nou la bézoin, sa sé in bon zoutiy pou nou fé nout l’avnir... sof ké bon parol i komann bon désizyon, mé bann bon désizon ni trouv i tarde pou arivé.
Mé soman, kan mi rapèl sak la ministrès l’Outre-mèr la vni di, èl ossi son koté, sansa sak lo parti d’la Droite i anons tazantan dann bèk lo roi martin Sintandré, sinon lo zoli garson d’Tanpon, sansa ankor toute bann "alimé di bokal" i tourn-tourn otour konm papiyon la lanp... l’èr-la, nou l’apré a domandé si tousa d’moun lé dann mèm parti, si zot i vé la mèm shoz pou La Rényon, si zot i partaz in mèm filozofi… par l’fète, la pa bézoin a d’mandé pars kant inn i di "A", lé z’ot i di "B", kant inn i di i fo fé "si", lé z’ot i domann k’i fé "la". Oté Baya ! si sé in lorkès, li lé bon aryink pou fé danss lo ra… kèl kalité kakafoni !
Dann tousala, pli pir ankor, kan lo prézidan — li lété Minis l’Intéryèr dann tan-la ! — i vyin pou sign in gran kontra avèk in bon paké milyar pou nou, ala son bann, issi La Rényon, i kash pa d’dir zot i sava fou kou d’kanif dann kontra-la : zot i vé pi sak z’ot prézidan la signé, parol li la doné. Alors, koman prézidan-la i doi santi ali ? Kossa li doi pansé dann fonn li-mèm ? Kan li lé antouré avèk in bann moun tya-tya i vé pa sak li vé ditou sak li vé ? Dizon, li doi z’ète malèz ! Dizon, konm di lo patoi, li doi z’ète konm in shyin dan l’arozoir.

 Justin 


Kanalreunion.com