Oté

Konm k’i diré lo viss i konplimante la vèrti !

Justin / 9 avril 2011

Méssyé Césaire, mi oi banna la nyabou panthéoniz aou, la nyabou mète aou dann so gran mézon ousa i mète toute bann Fransé sak lété inportan. Mèm Sarkozy la débal son gran diskour pou la galri. Rozman pou ou, out kor l’arèss la-ba dann out péi, la Martinik ; Rozman galman, koté ou, la mète plak pou in bann gran bononm konm Félix Eboué, Toussaint Louvèrture, Louis Delgrès. Nana ossi in gran l’ékrivin i apèl Alexandre Dumas, in pti zanfan zésklav. Moin lé kontan pars demoun va konète zot lé la-ba, é mi souète pandan lontan v’alé oir azot, épi va réfléshi déssi zot vi, déssi sak zot la lèss pou l’imanité an patrimoine.

Moin la antann in gran madam, in gran konbatan la koz anti-kolonyal, Christiane Taubira, té apré di : « I fo pa kroir Aimé Césaire sé in zantiy, i fo pa kroir va nyabou rékipèr ali konmsa » pou détourn son vi, pou détourn son konba dann in fo-sans, pou mète an avan in movèz politik. In politik la fé la shass bann Rom, la fé tyé san mil Malgash révolté, la fé la guèr bann Vietnamien épi bann z’Alzérien, la fé z’ami-z’ami avèk bann partizan l’apartède, é in bonpé z’afèr d’mal ankor. I pé pa détourn aou pou fé aksèpt in mové politik konm sa !

Aimé Césaire, banna lé pa jéné don ? So bann moun i rokoné mèm pa lo jéni bann pèp afrikin, zot rol dann listoir l’imanité. Kissa la pronons diskour Dakar si la pa prézidan la France ? Zordi i kontinyé ésploité la-ba dann la Kote d’Ivoire épi dann bonpé péi l’Afrik. Si mi tronp pa, sé lo pti ome Sarkozy la pronons diskour Dakar. Pou moin, banna lé diskalifyé pou koz de ou. Zot i mète lo doi dann zot zyé si zot la oubli ou sé in robèl définitif. Zot rokonésans, sanm pou moin, sé konm sak in pé i apèl in konpliman lo viss i adrèss la vèrti.

Justin


Kanalreunion.com