Oté

Konm lo dsi fèy sonz !

Justin / 9 séptanm 2011

Mame Zakline lé dépité La Rényon. Zordi, a s’ki prétan, èl i vé ète sénatèr, vi k’èl lé kandida dsi la list l’ump, méssyé fontaine lo mèr Sin-Pyèr. Donk i fo li fé romark aèl in pé, pars dépi lo tan èl lé dépité, moin la pa vi dann zournal in propozisyon pou La Rényon, in propozisyon k’i tyinbo la rout. in propozisyon pou tir nout péi dann malizé. Kraz séga sé in bon afèr é la pa moin va arprosh aèl fé sa, mé si èl i trouv son plézir la-dan, la pa sa, pou l’instan va sov anou. Bate Karé Adélaïde ? Sète-la mi dout é mi atann lo rézilta. Domann Didier sibvansyon ? Sa i marsh, é i gonf la posh l’IRT, mé ziska zordi mi oi pa bon-bon rézilta.
Kosa Zakline la fé, pou k’i mérite aèl, na dé-troi zour in plas dann zournal ? El l’atak konsèy zénéralé , pars d’apré èl, sé konsèy zénéral l’otèr si l’Arast la foiré. Biensir, nout dépité, i koné pa koman lé shoz la spassé. Sa la pa son traka !, Epi konm la voi d’son mètr, èl i répète partou sé la fote konsèy zénéral, sé sa fote, sé sa tré grann fote. Bien bon ! Mé la pa zordi i sort kozman konmsa, épi in shaplé la mantri i fé pa in pti vérité, mèm si bann médya i bate tanbour, mèm si bann royal bourbon la politik i aboye dann bann radyo, é i fé in bann prosé i fini la plipar d’tan an lo d’boudin. Donkalor, zordi, èl i domann lo gouvèrnman koman i fo fé in prosé pou in bann zélu, i réspèk pa zot parol épi i zète bann travayèr dann shomaz.In bon késtyon ! Mé akoz èl i koz pa avèk Didyé pou domann sète-la konbien shomèr anplis an parmi bann travayèr batiman par l’fète son bann désizyondsi la rokade Tampon, la MCUR, lo tram-train, l’otonomi dann lénèrzi.... Akoz èl i domann pa gouvèrnman si lé possib fé lo nouvo mazorité konsèy réjyonal in prosé pou tout déga li la fé an parmi bann travayèr.
Astèr, pou arvni in pé déssi l’atak mme Zakline kont konsèy zénéral, sanm pou moin,sé konm in kou d’sab dann lo, kou d’pyé, kou d’poi dann vide. Touléka, prézidant konsèy zénéral la di sa i fé pa èl, ni sho, ni fré. Dizon,lo dsi fèy sonz !

Justin


Kanalreunion.com