Oté

Konm lo dyab dan lo bénite !

Justin / 25 avril 2012

Mon bann dalon(e), inkroiyab, mé vré ! Moin la vi dann télé bann l’UMP apré fé la fèt. Kèl koté, solon zot ? Pa dann in l’androi zot la gingn in siksé fou, mé isi La Rényon. Poitan, isi, zot na poin do koi fé la fèt. Promyé foi, sanm pou moin, zot i fé in mové éskor konmsa. Zot la mèm pa gingn vin pour san bann voi. I fo dir galman zot la pa fé gran-shoz pou gagné : apark’la vizit lo pti prézidan, mi oi pa. Moin la pa vi bann gran rényon. Moin la pa vi bann militan marsh marsh in pé partou, fane trak, asplik zot program. Boudikont, moin la pa vi azot fé kanpagn… amoins ké zot la fé sa an sou-marin ?
Touléka, lo pti prézidan, pou son par, li lé fé kanpagn. Si tèlman, momandoné, moin té i mazine li té apré fé la piblisité pou in pil éléktrik. Li té isi, li té la-ba, li té i koz, son z’épol té ki dsann té ki mont. Son zyé té i fé klignotan. Konm in vyé piblisité té i di : "Mé kosa k’i fé bouz ali konmsa ?"... Moin pèrsonèl, mi koné pa, mé mi akout demoun kosa i di, é sak zot i di lé pa tro rékonfortab pou lo pti prézidan. Biensir nana sak i di li la pèr kit son gran palé l’Elizé. Li la pèr li lé pi lo promyé parmi bann Fransé. Boudikont, li la pèr, konm in pé té i di, sort lo kapitol pou tonm dsi la rosh tarpéène, konm di Kréol, sort la polis pou vni gard-shanpèt. Moin lé pa sir lé vré, mé mi vann konm moin l’ashté.
Na in n’ot afèr osi mi vann konm moin l’ashté. Sé kosa solon zot ? I paré li nana dé troi vyé kont an aryèr. Lo kont dann tan li la roganiz la kanpagn Balladur. Sa i apèl l’afèr Karachi ! La zistis i tourn in pé dan lé z’alantour d’li. I paré osi, li osi li la tir son tar pou son prop kanpagn dann kof-for Liliane Bettencourt, é konm diré l’ot, la zistis l’apré rod lo pou dan son tèt. Kan ou lé prézidan la Répiblik, la zistis i gingn pa toush aou, mé kan ou lé pi, tansyon pangar. Pétèt pou sa osi li vé pa larg son plas prézidan. Rézilta ? Li larg pa lo kor. Li bouzot, li bouzot, li bouzot... konm lo dyab dan lo bénite.

 Justin 


Kanalreunion.com