Oté

Konm martin ki kouzi ! Konm zorèy koshon dann marmit poi !

Témoignages.re / 30 mé 2012

Mé z’ami, na d’gou antann tousa magouy in pé z’onm politik lé kapab fèr. Asiréman, bann moun-la la pa lo pli myé plasé pou prèsh la moral bann Rényoné. Mi vé parl bann magouyèr, bien antandi, pa bann viktime lo magouyaz... mé par l’fèt, bann vré viktime, sé la popilasyon. Na ka oir sak i éspas dépi 2010 ! Touléka, sé konm sa ké mi oi lé shoz, dopi in bon koup de tan.
L’ané 2010, kan i ariv dézyèm tour z’éléksyon réjyonal, lo list sosyalis la fine kapot dann fon ranpar, li pé pi ranport la viktoir. Solman mésyé Vergoz i di, li lès son list an plas pars li sava gingn la viktoir. Domoun la pans, lo boug lo zyé lé pli gran ké lo vant... Kan Vlody, lo soir z’éléksyon Konsèy zénéral, la di li lé kandida pou èt prézidan, konm di Iznogoud, pou èt kalif la plas lo kalif, madam Dindar, demoun la pans lo boug la mémoir té fine défalké... Mèm soir, sansa landomin, madam Bello i fé in déklarasyon konm de koi bann santris, sé son bann z’ènmi, é èl i paktiz pa èk banna. Demoun la maziné èl té i di sa arienk pou di lo kontrèr sak son parti té i di... Kan z’éléksyon réjyonal té fini, Didier fini rantré, Annette la parti oir ali gran zour pou gingn lo finansman lo sorti Nor. Demoun la pans li té i sava négosyé son l’éritaz sosyalis pou in pla lantiy. Mé pèrsone la pa fé plis in ka èk sa.
Ala ké z’éléksyon dépité i ariv, é bann lang i détak. L’UMP i tir son kandida koté d’Tampon, konm si li té i di Vlody rouvèr la port pou rantré. Ala ké Paulet Payet, son koté, i di na in vyé kontra rant mésyé Didier é Parti sosyalis, pou done sèt-la lo syèz dépité, plis la méri. Ala ké mésyé Lauret i di lo mèm z’afèr. Astèr, si ou i rogard in pé an aryèr, épi sak la spasé dépi tan-la, ou na konm dan l’idé tousala lé kalkilé konm pou partaz biftèk rant mésyé Didier èk son bann z’ami, épi Parti sosyalis, ké lé pa pli sosyalis ké Justin lé pap.
Ousa i lé la vérité ? Na arienk Didier épi Parti sosyalis pou rakont lo pli vré... sanas pétèt in l’ansien préfé la pi la zordi. Mé ziska zordi, zot i koz pa, zot i di pa arien, zot lé konm martin ki kouzi ! Konm zorèy koshon dann marmit poi !

NB : Dan kèl trin madam Bello i rant èl la ? In trin anti-PCR, mé aprésa ?

Justin


Kanalreunion.com