Oté

Konm poisson dann lo !

Justin / 30 séptanm 2014

Matant Zélida la ékrir Justin :

Mon shèr nové, mon spès salté, rouj-de-fon dovan l’éternité. Zéléksyon i ariv la é moin lé près sir bann rouj i rant an trans – i di osi léspri i mont dési. Afèr sa ? Pars zot i kroi ankor l’inposib pars d’apré moin karote lé kui, lo fon lé mèm brilé. M’a dir azot, mi konpran pa z’ot jèss. Ziska na poin tro lontan zot té i amenn sak zot téi apèl in politik l’inion, sansa l’alyans, sansa ankor rasanbloman mé mi pans zot lé shodé sé pou sa so kou isi i antann pi parl d’linyon, i anparl plizanplis lo parti fèrmé dsi li mèm. romark aou bien, si sé in moiyin pou zot pèrd ankor plis, la pa moin va trakas amoin pou sa. I pé pa z’ète pli roiyalis ké lo roi ! I pé pa z’ète non pli pli rouz de fon ké lo rouj de fon. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, trakas pa ou nout parti kominis la touzour baz dsi l’inyon é sa i dat pa d’yèr. lo CRADS té nout promyé l’inyon é la donn in bon rézilta… i pé pa dir lo kontrèr. Apré sa nou la fé l’inyon pou domann la loi 1946. Aprésa ankor nou la fé l’inyon kont la frod zéléksion, épi l’inyon pou la démokrasi, pou l’égalité sosyal, pou lo dévlopman é pou l’anvironeman, épi l’ané 2004 l’alyans l’amenn anou pran la tète la réjyon. donk la politik l’inyon, sa sé in n’afèr ni koné, é pa zordi nou va koup la kord avèk sa. Pou fé l’inyon, ni drés kanbaré avèk demoun i pans pa konm nou : sa lé normal ! Sa la pa konm i di in manjé koshon sirtou si lo kontra lé klèr, si lo bi lé koni par tout bann partnèr, si na l’onèkté rant lé z’inn é lé zot. Mé éskiz amoin souf sa dann out trou d’zorèy : pou an avoir in bon l’inyon i fo in parti for, avèk bann bon prinsip épi bann dirizan a l’èz an parmi lo pèp konm poisson dann lo, é son l’énèrzi i vien dann son lyézon avèk lo pèp. Ou i vé, ou i vé pa lé konmsa é pa otroman !

NB. In kozman pou la rout : "In min i lav l’ot !".. Sa sé lo prinsip mèm la solidarité. Sèy in kou lav in min tousèl kisoi dann in ganblo, kisoi dann in kivète, sansa sou in robiné k’i koul. Sa in n’afèr dir ; Sèy in kou zot va oir. Mé si ou i mète lo dé min, dann ganblo, inn i frote l’ot é l’ot i frote inn ; inn i pass savon épi inn kont l’ot i fé kimé i savone lé dé min. Inn i bros l’ot èk in bros lo zong.. Lé pa pli fasil ! lé pa pli éfikas ! Kalkil zot mèm, fé travay zot koko, fé bouy zot matyèr griz ; Sa i ansèrv kékshoz !.


Kanalreunion.com