Oté

Konm Proudhon té i di : "La propriyété, sé lo vol !" Mi lès azot réfléshi la dsi

Justin / 6 avril 2013

Matant Zélida la ékrir Justin :

Mon shèr nové, mon spès salté, rouj-de-fon dovan l’éternité,

Mi antann in pé l’apré agoniz bann rish, konm si si ou lé rish, ou la forséman vol demoun, sansa vol l’Éta. Mèm in pé la di, dan zot kanpagn, zot i èm pa bann rish... ou i oi kisa mi vé dir ! Bann rish lé bien nésésèr, pars si na poin bann rish, kisa i sava fé l’antropriz pou done demoun travay ? Kisa i sava ashèt bann z’afèr i sort l’ordinèr ? Kisa va pèy z’inpo an sifizans pou sak i apèl la dépans piblik ? Astèr, l’arzan i fé pti, biensir, sa sé son l’intéré. Alor, siouplé, sak i krétik bann rish, démié zot i fèrm in pé zot také : soi zot lé zalou é la zalouzi, sé in péshé, soi zot mèm lé rish épi zot i rod arienk pou tronp bann ti kolon. Tok ! Pran sa pou toi !

Justin la fé pou répons :

Mon vié matant k’i koz touzour la boush rouvèr,

Dé foi, mi èm bien antann out kozman, ou in pti kolon parmi bann ti kolon. Défoi moin lé a d’mandé kosa i lé pou ou in rish pars, moin pèrsonèl, mi ariv pa mazine kosa i lé in rish, konbien li nana l’arzan — kan i komans an avoir in bonpé zéro apré in shif, mi konpran pi arien. Koman li dépans sa ? Konm tout demoun, moin la fine gard dann télé, mé mi majine pa bien la réalité. Fransh vérité, mi koné mié kosa i lé la mizèr é koman in moun mizèr i débat pou viv. I fo dir, d’moun mizèr nana an poundiak dan lé z’alantour, é d’moun rish lé rar konm korn lapin.

Na défoi in pé i di, lo rish i mérit son rishès pars li la fé in gayar l’invansion. Sirman sa lé vré, mé la plipar d’tan, zot l’aplik in vié rosèt. In l’égzanp ? Dépouy mon voizin pou gonf mon pla. In n’ot l’égzanp. L’ésploitasion l’om par l’om. San zénéralizé, ni pé ropran lo kozman Proudhon té i di konm sa : "La propriyété, sé lo vol !". Mi lès azot kas zot koko la dsi.

Justin


Kanalreunion.com