Oté

Konm sa ni konpran la vi !

Justin / 28 juillet 2010

Matante Zélida la ékrir Justin :
Mon shèr nové, mon spès salté,
Mi pé dir aou, fransh vérité, moin la vu dann télé kékshoz valab. In pé d’moun intélizan l’apré fé in dossyé, konmsa l’UNESCO i déklar La Rényon, son bann piton é son bann ranpar konm patrimoine l’imanité, pars i di sa in n’afèr éksèpsyonèl, é pi inn boté inkroiyab. La i atann lo rézilta… i prétan la pa loin tonbé. Parl’fète, sa i sava fatig ankor azot bann rouj de fon, vi k’sé pa zot la fé sa. Tok ! Pran sa pou toi !

Justin la fé pou répons :
Mon vyé matante k’i koz aryink la boush rouvèr !
Alor d’apré vou, si i ariv in bon rézilta konm vi di, nou sar pa kontan ? Byinsir ké nou sar kontan si i fé valoir la boté nout péi. Byinsir ké nou lé kontan kan i mète nout péi an l’èr. Son piton, son ranpar, son natir lé éksépsyonèl ! Alor, byinsir k’i fo fé valoir ali.
Mé solman, sa i anpèsh pa fé valoir nout kiltir. Nout maloya lé rokoni konm patrimoine l’imanité : bravo ! Nout mizik, nout lang, nout l’armoni, sé in bon légzanp : bravo ! Nout séga, sé in n’afèr nout pèp la fé : bravo ! Konm sa ni konpran la vi !

Justin


Kanalreunion.com