Oté

Konm si la koup zonbri in moun èk la ash

Justin / 25 octob 2014

Ola vou zot, vou sé ki vou ? Sa in kozman i parfim a mwin touzour. Kan mi antan kozman konm sa, èk bann vié gramoun sirtou, bin, dizon mi shant èk zot. Konm mwin mi èm koz kréol, mwin lé dan mon bèr, dikou a mwin osi mi pran in l’èr pou kozé. Isi la rènyon shakinn nana son manièr kosé, kiswa dan lo sid, dan lo nor, sint roz ousinosa sin pol, landrwa nou lé nou larg nout son, shakinn. Pa mèm son partou, mém si la mizik lé lo mèm, lé bon, tout i konpran byin linn a lot. E poitan nou pa parti l’ékol pou sa, lé vni konmsa dopi tanm p’ti mèm, dopi lo tan nou té dann pikèt, dan la pangn. Zistoman dopi l’ékol, la di a nou, arèt èk sa. O lièr profité sak navé, sak té a nou déza, baz si nout soubasman parlfèt, pou mont dosi. Bin la di a nou zèt sak ta nou déza pou pran in ot lé pa ankor a nou. Pou koué la bliz a nou larg inn pou pran lot ? Pou koué la mont inn kont lot konm si inn té méyèr k’lot ?

O lièr, pétèt té falé tiliz inn pou konstri lot. An plis la bliz a nou zèt lo promié. Boudikont mi di méyèr manzé, pou mwin, sé promié manzé é promié manzé sé tété momon, la koup a nou sèk konm sa. Mèm si zordi lé pi konm lontan, ti bout-ti bout ni avans dan nout kozé, i koz, i ékri, i sobat, nou lé la. Sirtou ké nout lang lé rish. Kèl kantité limaz nana ? In zour in dalon travay i di a mwin, ti wa nout kréol a nou la lé rish é pou listré li di « ti wa, Télman lé rish, èk in grin zak, mi gingn fé in roman »Tyinbo d’bout : In pié d’zak, sé do lor konm nout lang, li donn zak byinsir, kiswa zak dir ousinonsa zak soso, i manz la gouss konm in fri, li donn osi ti-zak tann, po fé ti-zak boukané(fo bat) apré sa nana lo grin zak pou fé bouy(lontan nou té fé bouy dann manzé coshon), apré sa ankor nana fèy zak, pou manzé kabri. Kantité zafèr i pé fé èk in pié d’zak. Dann solèy i kashièt sou bransh zak, i fé lonbraz osi.

Tousala ni gingn rand kont parské ni koz kréol, koman rakont byin listwar piéd d’zak otroman ? Otroman lo kozman na pi ni gou ni santiman.I mank do sèl. Boudikont bana la konpri, koup a nou èk nout lang sé in pé konm si i koup a nou èk nout pié d’zak, donkalor i koup a nou èk nout manzé osi. Mon dié sénièr, la fé konm si la koup zonbri in moun èk la ash.


Kanalreunion.com