Oté

Konmsa o moins la ségrégasyon sar ékri dann in tèks de loi

Justin / 24 novanm 2010

Matant Zélida la ékrir Justin :
Mon shèr nové, mon spès salté,
Lotrozour, moin té apré ékout in radyo kankan. Demoun té apré ésplènn déssi sak zot té i apèl zot maléré sor. A s’ki paré, zot l’avé difikilté pou joinn lé dé bout par l’milyé. Mèm manzé, zot té blijé manj a krédi. Parl pi kan faktir téléfone, léstrésité, d’lo i sorte. L’èr-la té la galèr pou vréman. Momandoné, in madam la apèl lo radyo pou domann lo moun arète pléré konmsa. El la di in n’afèr, moin pèrsonèl, mi trouv lé vré : tout lo moun na moiyin ariv o-bi si i dépans an rézon sak i gingn. Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Fransh vérité, ankor in moun la tyé kouyon pou pran son plas, ankor in tik-tak i fo demann Sarko pou brévétizé. Dépans sak vi gingn é konmsa pèrsone nora poin pou ésplènn. Sof ké la vi lé shèr parèy pou toulmoun !
Toute i pass la kès é na poin in pri suivan larzan lo moi ou i gingn. Amoins ké ou i vé dir lo moun ashté solman sak li lé kapab péyé, épi sèr sintir plizanpli séré. Mèm sa i ariv pa o-bit !

Si i ékoute in pé, zot nora drès la list sak bann pov na lo droi ashté... In tan, l’avé in kode noir pou di sak bann zésklav l’avé lo droi fé é sak zot l’avé poin lo droi fé. Pétète in pé i vé in n’afèr konmsa zordi, in nouvo kode konsomatèr pov, avèk sak lo moun na lo droi dépansé é sak li la poin lo droi dépansé. Konmsa o moins la ségrégasyon sar ékri dann in tèks de loi.

Justin


Kanalreunion.com