Oté

Konsey d’Éta : Na konm in défo la-dan !

Justin / 14 août 2009

Mi souvyin in komik té k’i apèl Fernan Réno. Oté ! Boug-la, téi koné fé ri la boush de moun ! Mi rapèl, in zour, li té apré fé in sénète, té k’i nonm "lo tayèr", si mi tronp pa... In boug i komann in kostar, épi kan li vyin rodé, li an apèrsoi, nana in kantité défo. Shak foi, li di lo boug "na konm in défo !", lo boug i réponn ali : "Sé pars ou i tyin pa ou konm k’i fo !" ; dizon lo kliyan téi pran toultan la poz kass-in-ki... Afors, konm lo tayèr i fatig lo boug, sète-la i sava avèk son kostime masikrok, solman li di : "Demoun va di moin na la shans an avoir in bon tayèr pou fé zoli-zoli kostime, pou in boug mal-fouti !".
Kossa mon zistoir nana a oir avèk l’aktyalité ? Anbal pa, lir sak i vyn… zistoir-la i rapèl amoin sak in proféssèr té k’i di : I prétan dann linivèrsité, bann z’étidyan i aprann byin fé in bon l’abiyaz ziridik pou in désizyon an masikrok. konm bann ziz la parti l’inivèrsité, tik-tak la, sa zot i koné fé. La pa in ségré pou zot ! Zistoman konsèy d’éta i sort fé kék légzèrsis konmsa pou z’éléksyon. Donkalor, fé in l’abiyaz ziridik pou in zizman an kass-in-ki. Touléka, sé sak demoun i di ! Sé sak demoun i pans !
É moin, dann tousa-la, moin lé tanté d’dir, konm lo kliyan té i di : " Konsèy d’éta ? Na konm in défo la-dan !".

Justin



Lésplikasyon inn-dé pti mo :

Kass-in-ki : in moun tort-tort sansa in drol pozisyon.
Masikrok : gro doi.
Anbal pa : bouz pa lo bato.
L’abiyaz ziridik : kman bann ziz i ékri z’ot zizman.


Kanalreunion.com