Oté

Kont pa dsi baton tonton pou travèrs la rivir !

Justin / 18 zanvié 2016

Somenn pasé la COI la fé in rényon la-ba dann Tananariv. L’avé in bann poin dann l’ord di zour. An parmi l’avé in projé pou fé avèk Madégaskar lo magazinn dori pou bann péi nout réjyon, lo Maskarègn par l’fèt. Mé kisa la pran l’èr avèk nou ? Pèrsone. i prétan dir sé La frans k’i roprézant anou, mé konm moin la fine apèrsoir, gouvèrnman La Frans, pou son par, i pran pa l’èr non pli avèk nou. Konm d’abitid, li lé pa la avèk nou !

Magazin d’ri pou nou ? Zot lé bien zantiy mé mi èmré konète si sa sé in n’afèr bien kalkilé. Pars, sak i lir nout zournal Témoignages i koné bien i gingn plant de ri, isi shé nou, é anplis avèk in bon rannman. Pou l’istoir, ni doi dir la fine plant de ri isi : sa la pa in nouvoté pou zot… mi éspèr ! Na poin lontan mésyé Alfred Isautier, in l’ansien mèr sin-Pir, l’avé fé in kanpagn pou demann demoun pou plant de ri

Pétète zot va dir La tèr na poin ? Nana kant mèm sète mil éktar lé an frish, alors moin pèrsonèl mi di la tèr i mank pa nou si ni vé an avoir in bon prodiksyon de ri. Magazin d’ri pou nou ? Bin si in siklone i travèrs lo péi madégas, an long, an larz é an travèr. Si i mète in kou d’sésrès parl pa koman. An pliské sa, si in zénéral nana la movèz idé d’ fé in kou d’éta pi fé pète la gèr. Kèl klaité magazin do ri li va ansèrv pou nou.

Pou moin lé plis préférab la Rényon osi nana la sékirité alimantèr é so sékirité-la i pass pou nou par komans par dévlop nout prodiksyon manzé. San kont dsi baton tonton pou travèrs La rivir.


Kanalreunion.com