Oté

Konte déssi zot pou fé manz aou patate ansanm la po !

Justin / 18 zwin 2010

Dépi inn-dé zour, moin la aprann drol z’afèr dann journal déssi sak i apèl lo trainn vi bann minis. Moin la aprann, in minis, mèm in sou-minis i dor dann in shanm l’otèl i koute 667 éro la nuite... moins ké sa, lèss tonbé ! Moin la aprann galman, in sou-minis la fé ashté, par l’État, donk par nou, pou 12.000* éro sigar déssi in péryode dis moi, 1.200 éro par moi, donk pliské lo SMIC, in famiy travayèr i doi débrouye ali pou viv ansanm… Parl pi in érémis i gingn mèm pa la moityé. Parl pi in pti rotrété. Parl pa non pli in andikapé.
Sak i trakass amoin... sak i jiguil amoin… mèm sak i kass mon somèye, sé kan mi pans so bann moun l’apré okip toute bann késtyon k’i konsèrne in péi an kriz. Pars la France lé an kriz ! É, sa i zène pa zot fé fèr gro-gro dépans konmsa par l’État. Ankor, mi koné pa lo pri zot i pèye z’ot uiski, lo pri zot bann koktèl, épi lo bann ti zonèteté zot i fé rantre zot. Byinsir sa i manz pa in barkète manzé sink éro sa ! Byinsir sa i mète pa in shomiz douz éro, in blouzine vinn-sink éro ! Sa i voiyaz pa dann la plas bétayèr dann l’aviyon !
Bin lé ga, koman zot i vé so bann moun i pans bann ti-kolon. Koman zot i vé bann moun-la i kalkil kossa bann ti-kolon i manz, kèl linz i mète, koman i lé zot vyé kok loto. Séryé, sa la pa dmoun i fo donn lo pouvoir. Pars si ou i done sa lo pouvoir, konte déssi sa pou fé manz aou patate ansanm la po.

Justin

NB : dèrnyé minite, lo sou-minis i di, na d’ote ké li la tape dann boite sigar-la. Pars li la fime aryink pou 3.500 éro… Inn paye, pour sir ! Lo réstan inn-dé ra d’bato la souké.


Kanalreunion.com