Oté

Kosa i fé astèr ?

Justin / 27 septembre 2011

Z’éléksyon sénatèr la fini. Lo Séna la shanj mazorité. Bann droit ofisyèl la pèrd lo z’éléksyon. In gran viktoir ? Mi pans pa, pars lo Séna, li na in pé pouvoir, mé pa tèlman. In gran kou d’zok ? Sirman pou Sarkozy, pars sète moi avan z’éléksyon prézidansyèl, sirman, sa la afayi ali. Pars ziska dèrnyé l’instan, li té i kroi li va gingn ranvèrs la vapèr. Li la pa gingn fèr, épi sa i aranz pa son kari. Avèk tout sak i tonm dési li... i diré karapat dsi tété bèf mèg.

Isi La Rényon, lé shoz la pa spas konm nou té i atann. Nou l’avé lo moiyin an avoir dé sénatèr é nou la gingn arienk inn. Pou kosa ? Sirman pars in pé la pa konprann nout éstratézi, l’Inyon, é la vouli règ in kont. Ni koné pa lakèl, mé sak nou lé sir, lo rankine in pé lé solid. Azout èk sa, sanm pou moin, in pé i sousyé pa tro lo sor la moityé d’moun lé dann la mizèr La Rényon. Boudikont, sak lé fini lé fini, é moin la bien aprésyé lo zès Paul Vergès kan li la di, zordi lindi, li poz son démisyon é Gélita va kontinyé ète sénatèr.

Tout-fason, tout demoun i koné, in sénatèr an plis, in sénatèr an moins, sa i amène pa nou dann shomin galizé, sa i tir pa nou dann malizé. Mèm si Sarkozy i pèrd z’éléksyon moi d’mé, si bann dépité lé an mazorité dan la gosh, sa i fé pa avans nout koz. Pétète in pé fonksyonèr anplis ! Pétète in pé plis kontra édé ! Ou sinonsa dé-troi gran shantyé ! Mé sa i mète ar pa nou dann shomin nout dévlopman, pars sé sa k’i fo anou, si ni vé vréman. Sanm pou moin, ala sak ni doi fèr astèr.

Justin


Kanalreunion.com