Oté

Kosa in shoz : Lo nissart ?

Justin / 16 zwin 2011

Lé pa konpliké : sa in lang lé éné dann péi niçois, nana bien lontan, avan le fransé touléka. In lang lé marké konm lang réjyonal, parèy kréol rényoné, dann la konstitisyon la France. Ni sava pa diskite dési son l’orizine pars sansa va fé lèv la guèr rant bann demoun i èm ali konm nou Kréol rényoné ni èm nout lang. Ni sava pa non pli anparl la grafi. Sak ni pé dir, sé ké lang-la té kondané a mor par l’asimilasyon dann roiyome la France épizapré dann la Répiblik. Zordi li lé bien vivan. Kisa i parl sa ? Plizyèr dizène milyé d’pèrsone i parl so lang-la. Bann vyé, sak la gard la brèz désou la sanm pou anpèsh lo fé étinn, mé galman bann jenn la aprann sa dann lékol épi dési internet.
Figir azot, mon bann dalon, koméla nana in léprèv fakiltativ nissart kan i pass bak ; i done aou in modékri dann lang-la, ou i prépar aou, apré ou i lir dovan l’amontrèr, ou i réponn késtyon dési lo tèks, épi ou i traduir in boute sansa lo total. Konm léprèv kréol kan i pas bak. So kou isi — pars zot i koné légzamin-la i vien ! —, nana troi san kandida la fé mark zot nom pou se léprèv lé pa obligatoir. Lé bien ! Lé ankourajan ! Pars sa bann jenn, épi na poin si tèlman lontan i fé so léprèv’la. Bann marmay, la télé la koz ansanm, i ésplik zot la pran sa pars i pé gingn inn-dé poin (kan la note i dépas dis dési vin), mé i pé osi koz avèk bann vyé pèrsone, épi aprann listoir lo péi, épi ankor aprann la kiltir. Boudikont, artrouv in pé son l’idantité dan la Répiblik, dann l’Erop, épi dann in mond plizanpli rouvèr. Pou fèr fas so lanvi aprann, sète ané la anbosh kat amontrèr dan la lang nissart. Arzout èk sa, banna nana zot révi bi-ling, zot lékol dési l’internet, zot bann pyès téate, zot bann zistoir, zot bann provèrb é tou sak i s’ansui.
Biensir, mi vé pa di tout i roul ron pou zot, é konm pou nou mèm. Zot i soufèr pars lo pouvoir la-ba Paris i koné pa bien dési kèl pyé li dans, épi moin lé sir nana rant zot in pé dézakor, mé konm isi pou lo kréol, lo nissart la-ba i fé son shomin, é lé bon pou banna ; Tienbo larg pa ! La vi sé la lite ! Ti pa, ti pa, v’arivé !

Justin

NB : In pti mo pou fini : lo mèr la vil Nice, méssyé Christian Estrosi, d’apré sak moin la tandi dir, la pa in lènmi la lang nissart, la pa non pli in l’advèrsèr la sivilizasyon épi lo patrimoine réjyonal... Poitan, zot dé in sèrtin Didier Robert lé ansanm-avèk dann biro politik l’UMP, é ni koné kosa sète-la i anpans nout kréol rényoné, nout kiltir rényonèz. Donk, so biro-la sré konm k’i diré, dési désèrtin poin (pars an zénéral, li lé réaksyonèr san pour san, é lo Estrosi an partikilyé la ède sabote nout tram-train), in mélanz torchon avèk sèrvyète.


Kanalreunion.com