Oté

Kosa ou la vni fé la, ozis ? Ou la vni kontrol in pé la kanpagn ? Lo rès, mi oi pa !

Justin / 26 zanvié 2015

Sa la komans dann tan Sarkozy ! Bann minis, pou in oui, pou in non, i vien an éskal shé nou ; pou kosa ? Mi koné pa, mé sak mi koné sé k’lé shoz i bouj pa, sirtou pa dann bon sans ? Aprésa, sa la kontinyé avèk holland ; pou in oui, pou in non, ala ké lo bann minis i débark. Avèk zot kontinjan pou akonpagn azot konmsi shakinn lété in bout prézidan par li-mèm, shakinn lé kalif la plas lo kalif. Nou, dann in tourbiyon konmsa, nou lé a d’mandé kosa l’ariv anou ? Bondié la piss dsi nout tète ? In-in-in. Ni kour in gran danzé ? In-in-in ! Si nou lé dann malizé, sa i vé pa dir lo péi i sava koulé, é la pa in voiyaz minister va sov anou.

Alor kok i éspass ? Pétète lo voiyaz lé intérésan. Sirman, mé partou lo voiyaz lé intérésan. Nana in bon nouvèl pou aport pèrsonèlman ? In-in-in ! par mail i sar pli vite. Somanké i voiyaz gratuit ? Sirman mé sa i ésplik pa ké lo voiyaz lé nésésèr. Alor, bann sosyalis i di arien pars zot lé pi alèz-blèz ? Pétète mé koméla na tout sort manyèr pou fé lé shoz. Pétète, i fo vnir tazantan pou rodrès in pé brotèl in pé ; mé mèm sa mi kroi pa.

Alor sré t’i ké lo manjé lé bon é afors voiyazé mi sipoz èl i sar manz manzé dann in ta péi é lo bon siouplé ; mé mèm sa i ésplik pa son voiyaz. Nout journal la di èl la vni pou mète o kondisyonèl sak Holland la di a lindikatif… Alors madam la minis, madam la dépité parizyène asplik anou in pé kosa ou la vni fé pars a bien rogardé mi oi pa kosa ou la fé pandan dé zour. Lé vré ké ou la poin lo kont pou rann amoin, mé di amoin ! Dann mon zorèy, dousman-dousman, arienk pou konète !

« Bef dovan, i boir lo prop »-in kozman pou la rout


Dabor sak i tonm sou l’ sans : dann in troupo bèf, na inn i pran la tète. Sète-la, i fo lé zot i lès ali ansèrv ali an promyé kisoi in boushé manjé, kisoi in pti sours delo. I apèl sa lo bèf dominan ou bien dominèr si zot i vé… Dann in sharète parèy : na sak i ral lo sharète, é na lo bèf l’aryèr i vien loin la ba. Si tèlman kan lo bèf dovan la fine boir d’lo, pétète li fé in pti bozoin an pasan. Donk kan bèf l’aryèr i ariv, na pi riyin do bon pou d’bon... Zèrb tann na pi ! Lo fré, na pi, i rès arienk la koshonsté. In sans zénéral : i pé an avoir in sans dann bann rolasyon rant lo moun : promyé arivé, promyé sèrvi ! La zamé ariv azot in ka konmsa kisoi pou zot favèr, kisoi kontre zot ? Fé travay zot koko ! Fé bouy zot matyèr griz ! Moin lé sir rant-rant ni pé tonm dakor rantre nou.


Kanalreunion.com