Oté

Koz an poursantaz sak i vé ! Tout fason, na in zour i apèl domin !

Justin / 3 désanm 2012

Dann zournal la droit, konm dann télé, somèn dèrnièr la anparl lo Séna, la anparl galman bann sénatèr. Pa tout, mé dé solman pars, sanm pou moin, lo dé sénatèr la droit na poin gran shoz pou di ziska zordi. Lo dé sénatèr banna i anparl, sé Michel Vergoz épi Paul Vergès. Inn i pans lé shoz i sava konm zot i doi, épi l’ot i pans la sitiasion lé tèlman grav ké sak la fé ziska zordi, sé konm k’i diré in kotèr dsi in zanm de boi.

Vergoz, an éspésialis la politik l’Éta sosialis, i di ziska François Hollande, é lo gouvèrnman li la nomé, la fine trap 20% zot obzéktif pou lo mandatir. 20%, alé savoir ousa li trouv sa ! Alé savoir koman li kalkil sa ! A moin ké li lé tèlman kontan èt sénatèr é son sitiasion lé si tèlman bon ké li kroi sèt lé zot lé parèy. Paul Vergès, pou son par, i oi nout l’ékonomi rénionèz, nout sosiété, nout bann prodiksion apré dékaniy firamézir é an vitès. Pars, mi kroi, konm in bonpé rantre nou, sé sak i éspas La Rényon k’i konsèrn anou an prémié. Mi di pa sak i éspas dan la Frans épi dann l’Erop i konsèrn pa nou, mé konm i di souvan, shakinn i oi l’èr dsi son montr.

Pou sak i éspas dovan nout zié, i pé pa dir lé ankourajan, lé mèm rajan tou sinploman. Zot i oi nout kantité shomèr, zot i oi nout prodiksion koman kérandi, lo nonm z’ilétré, lo éstok demoun lé dsou lo sèy la mizèr. Arzout èk sa, la sitiasion, orlèk amélioré i dégrèn, olèrk dégrèn moin vit, i dégrèn pli vit. Pars si l’avé amélioré, mèm si l’avé ralanti lo dégrénaz, narté bon pou nou. La pa lo ka malorozman ! Astèr, ni koné bien bann sosialis i sar pa aksèp pèrd lo pouvoir konm sa, mi pans zot va lité, é si zot i gingn fé kroir d’moun dan sink-an la sitiasion la shanj an mié, ou sinonsa si la shanj an mié pou vréman, zot na in shans gard lo pouvoir. Si an kontrèr lé shoz la dégréné é la kominikasion la pa niabou fé prann anou po d’shanm pou pla kouvèr, lé posib sa i aranj pa zot ka.

Mé o-fon, la pa sa k’i intérès anou. Sak i intérès anou, sé sort dan lo sèrk l’anfèr la kriz é sé rant dann shomin dévlopman. L’èr la, koz pa an poursantaz sak i vé ! Rakont mantèr sak i vé, mé na in zour i apèl domin. 

 Justin 


Kanalreunion.com