Oté

Koz lézèrman, sa la pa dan mon san !

Justin / 22 out 2012

Matant Zélida la ékrir Justin :
Mon shèr nové, mon spès salté,
Askiz amoin si mi kas aou i pé lé bob, mé mi gingn pa anpèsh amoin takine bann rouj-de-fon, pars konm k’i diré, mi koné azot par kèr. Kan na in kékshoz, dan l’aktyalité, i intérès demoun, zot lé pa la èk sa. Mi koné pa pou kosa zot i kas zot koko pou anparl in n’ot afèr. Ala k’zot i mèt a parl lo réshofman klimatik, lo rolèvman nivo la mèr, in tash dsi lo solèy. Sa i fé rir amoin, pars i diré zot i vé pa, konm di lo kont, èt an dyapazon avèk la popilasyon. Kan demoun i aprann sa (si zot i aprann !), dan zot kèr zot i pans bann rouj-de-fon la, sa la pa parèy toulmoun ! Dizon, in sipozisyon, in moun i fé trap ali par rokin. Toulmoun lé intérésé, toulmoun i ransègn. Dann zournal, rouj lé pa présé anparl de sa, na lo tan pou ékri la-dsi. Donk konm di lo kont : la vitès na son tan ! Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr, si ou té i égzis pa, noré fali invant aou,
Mi èm bien kalité kozman konmsa, pars sanm pou ou, i fo touzour align aou avèk bann fézèr l’aktyalité. Mèm si i pran pa lo tan pou kalkilé kosa i sava di. Sé pou sa, tazantan, in pé i rézone konm tanbour pars zot ékri, sansa zot kozman i baz pa dsi la réfléksyon. I ékri pou ékrir é tanpir si i tap koté la plak. Mé solman, matant, si ou i di amoin, lo réshofman klimatik, lo rolèvman nivo d’la mèr, lo l’agrandisman la koush l’ozone, sa la pa in bann sizé k’i mérit nout atansyon, l’èr-la, sé a mon tour invit aou fé travay in pé out koko. Zistoman, mi sort lir, in plas, nivo la mèr lé riskab monté par-la in mèt-karant dsi la finisyon vintéinyèm syèkl, é la tanpératir moiyène lé kapab goumant rant dé é troi dégré. Si sa la pa inportan, l’èr-la mi koné pa kosa lé inportan é kosa lé sibzidyèr. Sak mi koné, sé si toulmoun i fé konm ou, kan malèr v’arivé, va rès solman nout larm pou pléré. Koz lézèrman pou évit sak lé grav, sa la pa dan mon san. Tok ! Pran sa pou ou !

Justin


Kanalreunion.com