Oté

Kozé oui, mé fèr... sé in n’ote afèr !

Justin / 9 zanvié 2010

Zédi sète zanvyé, in bann défalké la parti fé z’ot sinéma la-ba Sin-Pol pou tash moiyin anpèsh la konstriksyon la MCUR. I prétan dir, an parmi lo bann vayan moyanbane, lo bann tyé sète, blèss katorz, anfin sak la ékri an dèrnyé déssi lo bann liv l’avé Virapoullé — pou l’okazyon, siportèr bann Boana — l’avé Aniel Boyer — in moun i prétan li lé pou l’indépandans La Rényon, épi in n’ote moun, in l’ansyin kominis la pèrde la bann’ apré sak mi antann dir.
Sa in program banna nana. A oui ! Parl pa d’sa ! Zot i vé solman kassé sak l’Alyans la fine fé, é anpèsh kontinyé lo program. Pou sa, zot i konte déssi la Droite o-pouvoir dan la Frans… zot i konte ossi déssi prézidan la Frans. Kossa zot i vé kassé-brizé ? Inn, anpèsh fé la MCUR. Dé, anpèsh fé lo tram-train. Troi, dékomann bann A 380, anpèsh fé in konpagni bato dann loséan indyin, étsétéri-étsétéra, la ké lo ra ! Zot i vé ankor kass l’otonomi dann l’énèrzi. Moin, pèrsonèl, mi rokomann dégrenn la route Tamarin, bann lissé HQE la Réjyon la fine fé, épi si zot nana ankor in pé kouraj, arash bann ui-san-mil pyé d’boi i sava plante déssi la route Tamarin.
Mé, pou fé sa… i fo ankor gouvèrnman i aplik in politik la-ba dan la Frans é in n’ote issi déssi la késtyonn dévlopman dirab... i dévir lo do avèk lo grenèl l’anvironman… épi i fo gingn zéléksyon réjyonal. La pa sinp oui ! Épi demoun La Rényon, mi pans pa va lèss azot fé konmsa pars, ti-lanp ti-lanp, demoun i komans konprann in pé lé shoz, antann parl l’éshofman klimatik, la fine konprann la otèr la mèr lé riskab ogoumanté... Kozé oui, mé fèr, sé in n’ote afèr !

 Justin 


Kanalreunion.com