Oté

Kozé sé kozé ! In mo sa na son sans !

Justin / 3 zwiyé 2015

Mi antan parfoi in pé i di in lang sa lé pa angajé, in lang sa lé neut. In moun i pé ète angajé : in zournalis i pé z’ète konm sa ! In l’ékrivin i pé z’ète konmsa osi ! In mon normal i pé ète angajé. Li nana in koz a défann é li donn tout sak li pé dann la défans son koz a défann. Sa lé fasil pou konprann.

Solman dann in kozman in mo i pé signal kisa ou i lé, kèl sé out l’opinyon, kèl konba ou i amen ou sansa ou Ii vé améné, kèl l’opinyon sé la vote. Nana kék z’ané an aryèr La rényon té divizé dann dé kan, inn té kont l’ot, é l’ot té kont inn. Si tèlman noré di li lé divizé an dé. Zot i rapèl l’avé lo kan l’otonomi épi lo kan départmantalis. Sa lété klèr, lété nèt, é konm i di lo dé poinnvizé lété pa bon pou konsilyé.

Lo tan la pasé, é zordi le l’opozisyon la fine près pasé. Solman dann kozmann moun sé ankor in n’afèr k’i rès. In légzanp : i intéroz bann fitir mis, é ala ké zot i di zot i pans zot sar lo méyèr l’avoka pou « mon île ». Zot la antandi : mon il, zamé mon péi. A tou lé kou sak i di « mon péi » li pans pa konm sak i di « mon il ». A tou lé kou sak i di « mon il », li pans pa konm sak i di « mon péi »

Mon péi, sa lé patriotik pa l’ot ! Mon « il » sa lé zéografik épi touristik, pa l’ot. Konm di lo kont : Kozé sé kozé, mé in mo sé in mo é sa nana son sans.


Kanalreunion.com