Oté

Kozman déssi l’istoir « Kan sar fini, son kèr va palpité ! »

Justin / 22 séptanm 2010

Matante Zélida la ékrir Justin :
Mon shèr nové, mon spès salté,
Mi sort lir dann “Zournal de l’il” in sobatkoz avèk méssyé Sita, lo résponsab la Kiltir dann nouvo Konsèy réjyonal. É bin, lo boug i di sak mi pans dépi lontan, i fo "arète plèr déssi nout passé !". Moin sré mèm dakor pou dir k’i fo lèss lo passé ousa k’li lé, épi pans lo prézan krémizèr d’in sor, tourn anou dann diréksyon l’avnir. Vi koné, sa sé in n’afèr mi siporte pa dann la mantalité bann rouj de fon, so manyèr zot nana d’plèr déssi nout passé. Alé oir sa i ansèrv de riyin. Alon fé sak lé itil. Sa sé in n’afèr ké la Droite va amontr azot fèr. Tok, pran sa pou toi.

Justin la fé pou répons :
Mon vyé matante k’i koz touzour la boush rouvèr,
Mi romark ou na bon-bon référans, pars, fransh vérité, mi rokoné pa méssyé Sita konm in gran konésèr nout passé La Rényon. Pléré, sa inn fasonn parlé ! Sak li vé dir, sé ké nout passé lé pa si inportan ké sa. Poitan, l’istoir in péi, l’istoir in pèp, sa lé inportan. Sé pou sa k’in pé partou, banna l’apré émite nout projé la MCUR, pou mète zot l’istoir an-lèr, pou fé konète ali in pé byin. Lé si tèlman inportan ké la-ba dann Paris, i sava fé in Mizé l’istoir la France. Yèr matin, déssi radio France-inter, dann in l’émisyon, l’avé invite méssyé Frédéric Mitterrand, minis la Kiltir. In zournalist la di ali, son kèr i palpite pa pou lo mizé d’listoir. Lo minis la réponn lo boug, koméla non, mé kan sar fini, son kèr va palpité. Sa lé sir !

Justin


Kanalreunion.com