Oté

Kréol la lé pa kouyion vréman, ti kroi pa ?

Témoignages.re / 7 janvier 2014

Mi pans nou lé kapab dan nout péi ; sa in slogan in lasosiasyon biin konu isi.

Mi sar fé dé troi réfleksyon si laprè-siklone …

Dabor, si tout mon bann bananié (piétfig) la kasé dan ma kour ; nana sak la tonm si lo ti palmié miltiplian mon voizin, in zoreyi ; anfin li viin arivé, inn ti vèv kréol la parti an Frans la aminn a li isi : li koné tout.

Mé lo gro tron fig èk in bél baba la sèlman tonbé san dérasiné ; mi di lo ti vèv : « I res so gro bananié, li lé tro lour ; mi atann mon frèr i sort Sindni li va éd amoin lévé, mon koté, shé moin, dousman, ma apuyi a li èl in groboi èk in fours po nou pa pèrd lo rézime fig… »

Koué lo bonnom i di li : « je peux pousser de mon côté, maintenant ? » -« toi, tu touches à rien ! », mi fé a lu pou répons.

Oté, si li pous son koté, li va kas mon baba fig ; sa lé frazil, i kas sèk ; li koné pa sa ditou ; lé pa son kiltir ; i fo li artourn son péi ardrés piè pome aprè tanpèt an Bretagn ; lès a nou rolèv nout bananié, nouminm.

Apré, in lantropriz soutrétan EDF i viin répar in kab lot voizin : mi dmann a zot si zot lé pa militèr po plézanté : ki sa lé kolonèl ant zot ; mi éksplik a zot koman diréktèr EDF la koz konm Napoléon : « nu atak la ot tansion, aprè sé la batay po la moyèn é pi ansuit solman la bas tansion ! »

Lo minis Lurel i arviin osi : oté, mi apran ke bann sivil éspésialis kouran léktrik i ariv i sort l’ Ecosse ! Lo boug i kont si son doi : biyé lavion, lotèl…konbiin i sar kouté ?

Po armèt rézo léktrik an éta, ifo fé nir moun loin konm sa ? Kréol té ginye pa fé ?

Kréol la lé pa pli kouyion vréman, zot i kroi pa ?

 Justin 


Kanalreunion.com