Oté

Kréol lé kapab foutor !

Justin / 29 novembre 2011

Mi sort lir dann zournal yèr, an parmi tout bann réjyon l’Érop malad, lo pli malad, sé nout réjyon, sé nout péi, sé La Rényon. Plis vint-nèf pou san la popilasyon aktiv lé dann shomaj. Pou insi dir, késtyonn travay, késtyonn l’anploi, nou lé promyé par la ké... L’èr-la, mi domann amoin pou kosa ? Moin lé sir, in bann gran grèk l’ékonomi i sava di : sé pars demoun i fé tro z’anfan, sé pars in bonpé i profèr pa travay épi baz dési l’asistans. Arzout èk sa l’éloignman nou maladé ! Konm i di dann maloya. Moin pèrsonèl, sa in n’afèr mi kroi pa ; Mi gob pa sa konm zèf kri !
Pars, konm di lo kont, nou na z’atou dan nout zé : nout popilasyon lé zènn, na in bonpé d’moun èk in bon formasyon, kouraj pou travay i mank pa pou in bonpé, l’oséan Indien, poison i mank pa, l’otonomi dan l’énèrzi, nou lé kapab trapé. Nou lé loin ? Loinn koué ? Loinn l’Érop malad, mé l’Inn, l’Afrik di Sid, la Chine, Vietnam épi d’ot péi émèrzan lé près dsi nout pa d’port. Nou na voizin épi ni pé fé ko-dévlopman èk zot.
Bin alor, kosa k’i klosh pa ? Sanm pou moin, lo sistèm kolonyal la Frans la mèt isi, sé sa k’i klosh pa. Akoz ni ansèrv arienk déboushé pou bann kapitalis la Frans épi l’Erop ? Akoz ni blanshi l’arzan piblik pou transform ali an l’arzan privé pou gonf lo pla bann gro vaza ? Pou koué, kan na in n’afèr i marsh bien isi, gouvèrnman èk son bann konplisité i fé tout pou toufé ? Kréol na la mémoir, i rapèl kosa la spas pou la farine, pou do l’uil... Ni oi sak in pé i vé fé èk Air Austral, la vi kosa l’ariv tram-trin, kosa lé riskab ariv Soboriz. Donk, sé lo sistèm k’i marsh pa, touléka i marsh pa pou nou. Moin la di épi mi rodi, nou na z’atou dan nout min, é for z’atou ankor.
La prèv ? Kan la fé z’éta zénéro l’Outre-mèr, nou la bien konpri nou na la kapasité pou dévlop nout péi épi dan kèl diréksyon i fo alé. Alor, nout sityasionn shomaj la pa in fatalité. Si lé shoz i marsh tèt an ba, i fo armèt ali débout dsi son pyé. Si li lé a l’anvèr, i fo dévir ali bon koté, aprésa nou va oir lé shoz aranjé. Kréol lé kapab foutor d’in sor !

Justin


Kanalreunion.com