Oté

Kréol verboten, Rényoné verboten ?

Justin / 18 mars 2011

Na dé-troi zour, moin la antann dir, dann Park nasyonal lé o, la anbosh in bann gard vèr i sort la-ba dann la France. In tan la anbosh sis, é i prétan dir, so kou issi la arpran disète pou travay. Pou koué mi ékri i prétan dir ? Pars Park nasyonal la pa bate tanbour la ds, épi kan in bann dalon i domann lésplikasyon, i resoir pa zot. Mèm la diréktris rényonèz i kominik pa la-dsi ; Mèm Robokop lo prézidan lo park i koz pa la-dsi. Sé dir nana in n’afèr pou kashyété ! Bann jenn La Rényon lé pa asé instruiyé pou okip bann plas travay-la ? Sansa i pans toute Rényoné sé in bann kontro-bandyé, vandèr shovrète dann tant kouvert, pozèr d’kol, shassèr d’tang an kont-sézon ?

Na dé-troi moi, bann nouvo amontrèr rényoné té blizé alé dan la France pou fé zot éstaz. Pars issi noré poin léstaz pou zot ? Sansa pars la-ba i aprann myé, mèm si la-ba, lédikasyon nasyonal lé in pé an dégréné, près dèrnyé dann l’Erop. In pé i di sa in voiyaz alé, san rotour, konm in l’Prdonans oktob-soisant k’i vé pa di son nom ; Proshin rantré, nora plizyèr santène amontrèr z’ilétré dann la lang kréol rényoné lé riskab vni pou kapar lo bann plas travay.

Nana plis san Rényoné na Bak plis uit. I apèl sa in bann doktèr, é sa l’apré pèrsoir lo RMI. Issi, Bak plis sink, plis kat, BTS i grouye, é sa lé dann shomaj. Toute bann travayèr batiman, sak nana in gran nivo formasyon, sak la travay déssi la rout Tamarin l’apré asiz an atandan i koup zot sédik... Apré, alé di out marmay i fo travay bien lékol pou an avoir in bon plas travay ! Marmay va kroir aou, sa lé sir !

Donk, moin lé a dmandé si lo pouvoir Sarkozy, apré an avoir fatig nout zorèy avèk lo dévlopman andojène, la pa déside an misouk avèk son bann konplis, sète déor konm sète issi, défann Kréol travay sir plas, interdi azot viv dann lo péi. Di pa moin zot fèy-dé-rout sé sa ! Di pa moin zot fèy-dé-rout sé Kréol verboten ! Rényoné verboten ! Konm dann tan bann nazi la okip la France !

 Justin 


Kanalreunion.com