Oté

Kroir sé in n’afèr, fèr kroir sé in métyé ! Apèl sa konm zot i vé !

J.B. / 29 mé 2015

Alor-la, sa in n’afèr i kas amoin. Figir azot, mésyé Holland la di konmsa : astèr li sa fé marsh l’égalité réèl dann bann péi l’outremèr. In bon nouvèl, in mové nouvèl ? Sansa in nouvèl an l’èr ? La loi l’égalité sa té voté l’ané 1946, ébin soisann dizan apré i arvien anparl anou in n’afèr konmsa ? Pous pa lo bato kant mèm !

Sak mi koné sé ké si na l’inégalité dann l’outre-mèr, sé par la fote l’éta. Lé vré avan l’avé in sort prime kolonyal pou bann fonksyonèr té i sort La Frans pou travay dann l’outre-mèr mé kan gouvèrnman la désid donn l’indèks bann fonksyonèr l’éta é nana d’ot bransh ké la suiv, li la pa pans bann travayèr dann privé. Banna la atann sinkant z’ané ! Astèr sé li k’i doi trouv la solisyon, pa nou. Alor ké li trouv par li mèm, ké li fé travay in pé son matyèr griz. !

Arzout èk sa dopi kék z’ané, li la aplik anou kalité d’loi pa pou dévlop anou mé pou mète anou dann la sosyérté libéral é san domann nout avi. Li l’apré aplik anou lo mondyalizasyon li domann pa nou nout avi. Sé lo madam Ledoux k’i roprézant anou, nou ni doi solman fèrm nout také épi konstat lo déga.
Tout fason, mésyé Holland nana son prop langaj é la pa konm la n’ot. Kan ou i pans li di in n’afèr ala ké li di lo kontrèr. Kroir sé kékshoz, fèr kroir sé in métyé. Apèl sa konm zot i vé !

NB An kréol nana in bonpé mo pou dir sa. Moin lé sir zot osi zot i koné in shapit la dsi.


Kanalreunion.com