Oté

Krwa pi d’moun i donn bondié san konfésyon !

Justin / 30 désanm 2014

Dopi 2012 ni antann in sèl rofrin si shomaz . Shomaz i goumant, shomaz i ésploz, shomaz i dovyin striktirèl. Donkalor, kosa ni kont fé pou lit pou vréman kont so shomaz la ? Mi di dopi 2012, mi parl pa sak avan, sa i vé pa di avan navé pwin shomaz, avan osi navé mé zistoman nou la bat lot prézidan déor zistoman pou zistwar shomaz antrot. Nou la vot pou lo prézidan aktièl èk son lékip, sak lé an plass, talèr dopi trwa zan déza. Parlfèt poukoué nou la vot pou li ? Mi réponn pa pou bann déor, mé pou nout par a nou, poukoué ? Li la promèt a nou baya. Pétèt avan minm son zéléksyon li la promèt.

Mi domann a mwin si li la pa promèt a nou tousala dopi lontan minm, mé sak lé sir, pliské sir minm, li la promèt a nou. Zot i pé di zordi té falé pa ékout a li su lo moman vik sé in onm politik é in onm politik souvan-dé-fwa i ramass mantèr pou fé élir a li é apré li tourn lo do èk tout. Mé si shomaz la, dikou li la may a nou, li la finté boudikont. Kan li lé vni war a nou avan zéléksyon, li la fé son prédikasyon laba sin lui é la li la ésplik a nou koman li va nyabou. Solman èk lo tram-trin li té kont règ tout, parl pi tou lo program li la gréné, lotonomi énérzétik, lanplwa pou bann réyoné, la kaz pou tout… tousala.

Zordi ispouré néna i di té falé pa vot pou li. Ni pé pa rofé listwar, sak lé fé, lé fé. Nou la pa fé sa san konprann, nou la fé in donan-donan ousinonsa in prété pou in randi, mé nou nou la doné é li ? Dikou sèt ané lo prézidan lé rovni é mwin, mwin la di an mwin minm, i ansèrv de ryin ékout a li vik li tyinbo pa son parol. Dopi 2012 li ral a nou dérièr, lané proshinn, lané proshinn. Pou 2015 mi kont pi d’si, zot i wa in léklèrsi dann sièl zot ? Si ni ékout ali voui, mé a mwin mi krwa pi d’moun i donn a ou bondié san konfésyon.


Kanalreunion.com