Oté

L’afèr Serge Copy : Nou lé pa kite èk sa !

Justin / 11 décembre 2010

Zédi apré-midi, komisyon disipline lédikasyon nasyonal la réinir, pou diskite déssi lo ka Serge Copy. Yèr matin vandrodi, dann radyo, nou la aprann la déside propoz in mitasyon dann l’égzagone, par raport son kondanasyon pou agrésyon séksyèl. Konmsa nou lé kite ? Mi rogrète, mé nou lé pa kite ditou.

Kozman rasist i kont pa !
Serge Copy la di, si zot i souvyin bien, in drol kozman, an plin dann tribinal, solon zournal de lil, avèk bann zandarm, solon lo prokirèr. Pass la-dsi ! Mé kosa li la di ? Sa in prof-fransé, é la rétorik, sa li koné. Donk li la di : « Je suis blanc et ils sont noirs, de toutes façons, c’est tous des nègres et des putes, c’est comme cela qu’il faut faire ». Sa la pa kozman in moun sou, sa kozman in moun i métriz son diskour. La i done ankor plis la fors lo mové fon son kozman rasist. Solman, la komisyon i kass pa la tète pou kozman rasist-la. Pars la pa di sa dann in lékol, lé konm si li la pa di.

Son kondanasyon ossi lé pa tro grav !
La komisyon i pans solman ké konm lo boug té kondané par tribinal pou agrésyon séksyèl déssi in jène fiy, sa i mérité in sanksyon. Kèl kalité sanksyon ? Lès ali in shans pou fé l’amontrèr pa issi, mé dann légzagone ? Dizon sa sé in protèksyon pou li plito k’in sanksyon. Serge Copy la ékrir dann son blog, li sar zizé par son bann dalon, donk li sar byin zizé. Konm di Kréol, « lo zo i soutien la shèr ! »... Aprésa, i anparl ossi lèss ali dé z’ané san toush son larzan ? : Sa i fo oir.

L’èr-la, kart lé dan la min minis lédikasyon nasyonal, Luc Chatel. Sé li k’i doi oir kèl sanksyon i pran kont Serge Copy. Li la fine di, li vé i radyé lo boug pou toute son vi. Astèr, i rèss pou oir son désizyon... in suite pou avéy sa, konm lé dsi l’fé.

Justin


Kanalreunion.com