Oté

L’aktyalité :
Akoz i rann pa Sézar, sak i an apartyin Sézar !?

Justin / 29 décembre 2009

Kossa i lé l’aktyalité ? Lé pa si fasill ké sa pou trouv in bon répons. Diksyonèr la di, pou li, a s’ki paré sé sak i éspas koméla. Byin bon ! Mé si i vé mète toussa-la dann télé, ou byin dann zournal, koman i fé ? Dabor, i fo konète sak la éspassé pou vréman… é si ou i koné, i fo fé in triyaz pars la pa toute z’afèr k’i éspas i pé anparlé. Alors, lo zournalis i fé son triyaz, épi li batiz sa"l’aktyalité". Pou li, sé sak la éspassé, é pou lo rèst, tanpir, pars son triyaz la pa rotonir lo z’afèr. Si lé pa kontan, pran konstan !
Mi sorte agard in zournal la droite é moin la vi in bon pé foto, dizon konm bann moun instruiyé i di, in tronbinoskope, é lo titr lété :"zot la fé laktyalté lané 2009". Toute kalité laktyalité, toute kalité d’moun. Donkalor, l’avé in bonpé foto d’moun, mé déssèrtinn foi, lété pa sa. In landroi, moin la vi lo portré la route tamarin : in route i dovyin in pèrsonaz par li-mèm ! Lé possib, in n’afèr konmsa ? Byin antandi ! Dann l’ote zournal, la droite la anparl méssyé Fillon, pars i di konmsa sé li la fé l’inoguirasyon la route Tamarin. Touléka, li la pa fé la rouvèrtir, pars si li lété la, moin nora romarké kant mèm ! Pétète i vé dir sé gras l’état la nyabou fé sa. Byin bon ! Mé i prétan dir l’état la pa mète in sèl kadsou la-dan, épi la Réjyon la mète prèss toute. Pétète, l’aktyalité sé l’otèr. L’aktyalité bann zournal épi bann radyo-télé la droite, byinsir ! Oté ! Konm di lo konte, rann in pé Sézar sak i an apartyin Sézar.

Justin


Kanalreunion.com