Oté

L’Amérik dann son rol komandèr lo mond !

Justin / 2 séptanm 2013

Si zot i lir désèrtin zournal, si zot i ékout désèrtin radyo, sansa zot i rogard désèrtin télé, moin lé sir é sèrtin zot i pans la-ba dann la Syrie, nana dé kan : in bon kan épi in mové kan. Moin lé sir galman zot i mazine sak i pran parti pou lo bon kan, zot lé dann bon kan é sak i pran parti pou lo mové kan zot lé dann mové kan. In légzanp, la shine i pran parti pou lo gouvèrnman la Syrie, lo mové, donk li lé dann mové kan. La Frans, i pran parti pou bann robèl, lo bon kan, donk èl lé dann bon kan.

Malorèzman lé shoz i marsh pa konmsa : la Chine i konpran bien l’Amérik l’apré rode in manyèr pou izol péi shinoi donk li fé tout sak li pé pou anspèsh l’Amérik tourn son fime. La Frans, li suiv l’Amérik dann son l’anvi kasé-brizé, konm na poin si tèlman lontan Sarkozy la rant dann ron dann La Libye, é Holland la rant dann ron laba dann Mali. Lé drol so zafèr-la : dopi zénéral De Gaulle La Frans la pass son tan paskal l’Amérik é ala ké zordi li mord molé lé zot pou bien fé konprann li la shanj de kan... Lé sirna pi arien pou oir avèk la diplomasi Zak Chirac, é lo diskour Dominik De Villepin lé bien loin déyèr nou.

Moin la poin tro la plas pou di tout sak mi pans, mé pou moin na in n’afèr i rosanm lé kant mèm plizanpli klèr. Pou kosa mi di sa ? Pars mi sort antann Obama di konmsa, l’Amérik va fé sak son zintéré i komann ali pou fé. Son zintéré ! Pa zintéré la pé, ni la démokrasi, ni lo droi bann pèp. Kosa son l’intéré i komann ali pou fé ? La pa pini la Syrie pou la késtyonn gaz. Pars sa sé pa son rézon, sé son prétèks l’apré kas par bout... konm pou atak l’Irak té i falé fé kroir lo péi l’avé bann z’arm déstriksyon masiv, mèm si té pa vré. Son lintéré sé lintéré in siper puisans i oi la chine i dovien plizanpli for, plizanpli rish é lé riskab romète an késtyon sak i apèl son lidership, donk son rol komandèr lo mond.

Si dann kékzour bann La Syrie i gingn in rafal bonb dsi son figuir, kroi amoin : sar pa pou la Syrie li mèm, sar mèm pa pou l’Iran son siportèr, mé sar pou lo rol komandèr l’Amérik i vé kontinyé zoué.

Justin 


Kanalreunion.com