Oté

L’ané pou Elie : Pétète lo boubou la pankor bien sikatrizé !

Justin / 15 zanvié 2011

In l’ané pou Elie ? Akoz pa ! Pars nana dé san z’ané, bann zéskav la révolté dann la komine Sin-Lé é lo shèf lété in komandèr té i apèl Elie. In gran révolt zésklav épi in réprésyon inkroiyab, sa in lévènman inportan dann nout l’istoir. Donk i fo anparlé, i fo fé konète bann Rényoné koman é pou kossa sa la éspassé. Dann in péi normal, tout demoun nora gingn konète sa. Mé pa issi, pa dann in sosyété la viv la moityé son l’istoir dann rézime lésklavaz é lo rèss dann in rézime kolonyal rokoni, sansa déguizé.

Promyèr foi moin la antann parl dé sa, lété, na bien lontan, dann in zournal bann zétidyan rényoné té i apèl "Rideau de cannes". La pa fé bonpé dézord pars bann gran média la pa anparl de sa. Épi apré, tazantan, kisoi bann zistorien, kisoi bann zournalist, kisoi ankor bann militan la parl de sa. Sak moin lé sir, solman, sé ké sak i apèl lo gran piblik i koné pa vréman so l’évènman-la. Moin sré kontan mi tronp, mé moin lé sir mi tronp pa.

Alor, si i déside, l’ané 2011, fé konète sa par in pé toute manyèr, moin lé sir bann Rényoné va fini par konsidèr sa konm in transh listoir nout péi. Biensir, nout listoir sé nout listoir, sé listoir tout bann Rényoné, mèm si li lé vyolan, mèm si li lé barbar. Si i déside fé konète l’évènman-la, la pa pou fé batay bann Rényoné rantre zot. Sa la spass nana lontan, mé pétète lo boubou la pankor, zordi ankor, sikatrizé.

Justin


Kanalreunion.com