Oté

L’Antrepo Médiastore la fèrmé In kou d’pyé dann progré kiltirèl bann jenn rényoné !

Justin / 27 zanvié 2011

Yèr, an plin dan Sin-Dni, in l’antrepriz la tak baro, épi vint-uit travayèr la rès dann bordaz shemin. Sa sé in n’afèr lé pa rar ! La Rényon : lantrepriz dan la difikilté, sa i an mank pa. É i an mank pa non pli travayèr dann shomaj, a pépré trann-sink pèrsone an plis, par zour, dépi pli d’in ané.
Sof ké, so foi issi, sa la pa in l’antropriz konm in n’ot. Sa in l’antropriz éspésyal, vi k’sak li vann sé konm k’i diré bann bien intéléktyèl. Dann tan nora apèl sa in libréri, mé li l’avé plis l’anbisyon k’in sinp libréri, li té vé ète in l’androi pou viv dan la Vil Sin-Dni. L’avé bann bien intéléktyèl pou vann, l’avé galman l’animasyon. Ou té i pé fèr ossi bann rankont avèk bann demoun l’avé mèm gou ké ou. L’avé moiyin avèy bann film épi agard bann konsèr. Lété valab ! Bann jenn é pa solman zot lété kontan an avoir in l’androi konmsa.
I prétan dir komèrs-la i fèrm pars l’avé tro dète larzan : loiyé tro shèr, la franshiz tro shèr ossi épi demoun téi sèr sintir déssi ban produi konm sa. Sirman lé vré é bann kassèr nout lékonomi lé pou késhoz la-dan. Mé fèrm in l’antropriz konm sa sé fèr déga, vi k’sé priv la jenès in lokazyon kiltiv aèl, aprann dé shoz, rouv son léspri déssi lo mond. Issi La Rényon z’afèr konmsa lé rar konm korn lapin, é sak i pran la résponsabilité fé fèrm sa, lé bien koupab. Zot i s’anfout sa ! Sé konm in koud’pyé dann lo progré kiltirel bann jenn rényoné !

 Justin 


Kanalreunion.com