Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

L’APE : akoz pa transform nout linkonvényan an avantaz ?

vandrodi 18 séptanm 2009, sanm Justin

Kan ou i koné i sava ariv aou in n’afèr é ou lé pa sir ète pré pou fèr-fas, lé normal ou i pran prékosyon. Si ou lé sir sé in mové z’afèr, ou sèy fé toute pou k’i ariv pa. Si sé in bon z’afèr, ou sèy fé toute sak ou i gingn pou k’i ariv. Mé si ou lé pa sir ? Lèr-la, i fo ou sèy konète lo konsékans sa lé riskab an avoir pou ou. Mi pans zot lé dakor èk moin ! Mi mazine zot lé pa konm so bann gro zoizo Lafrik-di-sid i apèl l’otrush, kan in shassèr i pèz déyèr li, li bour son tète dann trou galé é li lé pi la èk sa. Malérèzman, lo shassèr i anvoy son lans épi i tyé lo pov zoizo.
Pou kossa mi di sa, pars nana konm in n’afèr i sa ariv anou, i pandiy déssi noute tète konm in lépé la dame oklès, sa i apèl APE (Accord de partenariat économique) : sa i ariv déssi nou san k’nou la domandé. Nou la byin ésèy artard lo z’afèr konm nou té i gingn, mé ni oi, ti-lanp ti-lanp gran bobèsh, li ariv déssi nou. Na in somènn par-la, konm zot i koné, l’Érop la parti sign in n’afèr konmsa avèk bann péi nout rézyon, san dir anou, an kashyète, an misouk, an volèr. Nou, nou lété pa la, pèrsone la pa di anou aryin, la pa diskite èk nou… mèm si nou lé riskab ète lo pèrdan dann sète afèr.
La pankor définitiv, mé kan Parlman éropéin sar fine voté, i gingn ar pi rotourn an aryèr. Donkalor, ala in n’afèr k’i intérès anou… ala in n’afèr i fo tir dann fénoir, mète an plin dan la limyèr pou nou konète lo konsékans épi prépar anou pou nou ète lo plis paré possib kan sa va arivé, konpans noute féblès, ranfors nout poin for. Akoz pa transform nout linkonvényan an avantaz ?

Justin


Lésplikasyon inn-dé pti mo :

An misouk
 : an dsou, san k’ni koné.

Épé la dame oklès : plito l’épé Damoklès.

Dobèsh : la mèsh la lanp pétrol.

Ti lanp, ti lanp gran bobèsh
 : fyé pa dsi l’aparans.

Fénoir :
la nuite, l’ignorans, lo mank transparans.


Inn modékri, inn ti lavi, inn komantèr ?

signaler contenu


Facebook Twitter Linkedin Google plus