Oté

L’égalité réèl : I sar pa sèr ankor in kran la kord dann nout kolé ?

Justin / 21 mars 2016

Zot i koné mésyé Lurel la dépoz son rapor dsi l’égalité réèl. Li pèrsonèl, li la trouv son travay révolisyonèr épi, si gouvèrnman i désid pran son bann mézir é si lo parlman i vote lo loi konm k’i fo, ébin, pou li, sar in gran pa an avan pou l’outro-mèr. Mi kash pa dir azot son rapor nana katsan é in pé paz, donk moin la pa lir ali pou vréman, moin la ékout sak téi i di isi d’la-ba dann bann radio, moin la lir osi sak té marké dann zournal. Donk moin lé pankor paré pou donn in l’opinyon définitiv.

Solman moin lété Sint-Sizane samdi épi moin la bien suiv la konférans dsi lo soisant dizan la loi départmantalizasyon é moin la bien konprann dann kèl pyèz bann kapitalis fransé épi éropéin la mète anou. Zot la mète anou dann pyèz in sèrtin néo-kolonyalis : ansèrv l’ède piblik pou tyé nout prodiksyon intèryèr épi transform sa kaziman an sibvansyon pou z’ot boit.L’èr-la alon méfyé !

Kosa sa i vé dir ? Sa i vé dir lo sistèm konm li lé i pé pa vréman ède anou débrouye nout kari par nou mèm. Ranfors lo sistèm ? Sa la pa bon pou nou. Transform lo sistèm épi libèr anou par raport lo néo-kolonyalis dakor ! Nou la fine fé in bonpé tantativ pou tir nout kolé dann la. Shak foi lo la la sèr in pé plis. Ni sar pa sèr ankor in kran kant mèm ? Fransh vérité !


Kanalreunion.com