Oté

L’èr la, nou sar fine trap shomin nout réparasyon

Justin / 11 mai 2010

Vin désanm mil ui san karant-uit, dis nèf mars mil nèf san karant-sis, dis mé, lé konm bann born bordaz shomin pou trap nout réparasyon. Nana ankor d’ote, nora ankor d’ote born konmsa la.

Mé pou kossa anparl réparasyon ? Pou kossa dir i fo réparé ? Pars toute boubou nout listoir la pankor guéri, pars toute bann konsékans sak lé mové la pankor éfasé.

Réparé ? Sa i vé pa dir bann demoun koméla i doi bate déssi l’éstoma épi di : Sé ma fote, sé ma tré grann fote ! Sa i vé pa di zot lé koupab, sansa résponsab... pars sé konm sa é pa otroman listoir la pass azot témoin.

Réparé ? Pars nana ankor in bonpé shomin pou fé pou fini avèk bann sékèl la trète bann noir, lésklavaz, l’angazism épi lé zot tablatir nout pèp la gagné dann son listoir... pou fini avèk bann zanbèk.

Kan nou sar fine bate la mizèr a-tèr, épi l’ignorans, l’inégalité, lo shomaj avèk toute sak moin la poin la plass pou mark dann mon modékri… l’èr-la, nou sar fine kol shomin la réparasyon.

Justin


Kanalreunion.com