Oté

L’èr-la, tro tar pou di, nou té i koné pa !

Justin / 4 avril 2011

I fo pa anons fo nouvèl ! Sa lé bien vré. I fo pa non pli fé pèr d’moun kan i vo pa la pène ! Sa lé bien vré galman. Pou kossa mi di sa ? Pars nana konm in sobatkoz dépi inn-dé moi déssi la késtyonn lo danzé nikléèr dann l’oséan indien. In pé i di : "Lé pa néssésèr di in n’afèr konmsa kan ou la poin la prèv a konviksyon !". Nana d’ote, i di konmsa :" I vo myé donn l’alèrt zordi, pars kan v’ariv déssi nou sar tro tar !"

Lé vré dépi k’lo weakiliks la komans dévoil inn-dé ségré d’état, ni oi la politik bann gran péi otroman. Ziska zordi nou té i oi la fas A, zordi ni komans oir la fas B, sak lé kashyété, é k’i amontr pa zamé. Donk lo danzé nikléèr dann l’oséan indien, bonpé d’moun i anparl. Pou komansé bann zarm atomik dann la baz Diégo-Garcia, dann bann zil Chagos. La-ba, dann zournal Lil Maurice i anparl souvan ki soi dann zournal l’Express, ki soi dann d’ot kalité zournal.

Bann sou-marin nikléèr i tourn i vir dann loséan indien. L’Inn èk lo Pakistan sé dé péi nana l’arm nikléèr é sa lé pa si loin d’nou ké sa. Fit-in-tan, té i anparl in loséan indien san l’arm nikléèr, mé zordi sa i aparète konm in rèv, vi k’bann zamérikin, konm bann zanglé sa i réspèk pa arien. Lé vré ossi pou d’ote péi. Sak i intérèss azot sé fé lo bra-for koté nou, pou, konm di lo kont ardone favèr in nouvo lékilib dann la térèr, épi fé travay zot lindistri lé z’arm. Larzan la poin l’odèr !

Si i koz pa koméla, si i diskit pa rant bann péi, si bann pèp i mèl pa pou domann in loséan san lé z’arm nikléèr, in zour nou va lévé avèk do koi pou détrui san foi loséan indien épi son lantouraz. Arzout èk sa, l’antrotien bann bato, bann sou-marin atomik, souvan dé foi i fé défo. L’èr-la lé riskab ariv in gran katastrof ni mazine mèm pa koman sar térib. L’èr-la sar trotar pou di :"Nou té i koné pa ! L’èr-la, boudikont, i ansèrv ar pa derien di in n’afèr konmsa !"

Justin


Kanalreunion.com