Oté

L’ésans-la, sa i tard pa rogoumanté sa !

Justin / 7 zanvié 2015

Matant Zélidala ékrir Justin :
Mon shèr nové, mon spès salté, rouj-de-fon dovan l’éternité, vi koné moin la antann in n’afèr é sa léa fé plézir amoin pou vréman. Kosa ? I paré mésyé Didier la fine fé vni bann gro kador isi, pou fé in rafineri pétrol. Konmsa l’ésans va kout méyèr marshé. Zot, bann rouj de fon zot lé kapab fé myé k’sa zot ? Moun vilin na ankor, moun kouyon la pi. Aprésa koz azot, si zot i vé, fé bate zot lang mé mon l’opinyon lé fète. Didier sé sak i fo anou. Tok ! Pran sa pou toi !

Justin la fé pou répons :
Mon pov vyé matant k’i koz la boush rouvèr, ou i konpran pa sa sé pou bate atèr l’otonomi dann lénèrji. Ou i konpran pa sa sé pou ral anou an aryèr, pou d’bon ? Matant l’otonomi dann lénerji sé pou fé travay kréol avèk so sète san milyon l’éro pétroll ni fé vnir. Sa sé pou tout kalité lénèrji prop kisoi solèy, kisoi lo van, kisoi la mèr, kisoi la biomas, kisoi ankor toput kalité lénèrji pou fé avans nout dévlopman. E anplis fé travay kréol. Tanka lo rafineri pétrol é bin figuir aou bann zékspèr l’apré di dann dé zané, lo baril va kout dé san dolar pars bann sosyété i invèsti pi larzan dann bann zinstalasyon. Va tonm bien : lésans va grinp an flèsh é nou sar bati dann tout diréksyon. La moin é énèrvé la. Tok ! Pran sa pou ou !

In kozman pou la rout : « Ti ash i koup gro boi ! »


Sa in kozman danjéré sa pars la plipar di tan s é lo pti ash k’i pète son mansh sansa son lam dsi in bèl boi dir. Solman dé foi si i manyé lo boi ék lo ash an réspé ou i gingn koup gro boi avek ti ash. Oir demoun lontan kan té i fé bardo . Té pa avèk i ash bardo téi fé sa ? Té pa bèl-bèl tron tamarin té i tiliz. Si zouvriyé té abil, li té i trap son bi. Sans prop ! Sans figiré : i ariv dé foi, in gro l’ènmi i sikonm dovan in ladvèrsèr pli abil, pli kalkilatèr, pli madré. Zot i souvien David ansanm Golliath ? kisa la gagné ? Fé travay zot koko, fé bouy zot matyèr griz. Souvan dé foi, sansa rant-rant, ni pé tonm dakor.


Kanalreunion.com