Lakey lo sit > Chroniques > Oté
L’éshofman klimatik ? Sé nou, nout zanfan é nout ti-zanfan i sar pèy sa !
vandrodi 10 désanm 2010, sanm
La-ba dann in péi i apèl Méxique, dann in vil i apèl Cancun, nana in takon demoun la réini. Zot l’apré diskite déssi sak i fo fèr pou anpèsh lo klima tro shofé. Zot l’apré rode in tik-tak pou pran la suite lo protokol Kyoto. Lé shoz, d’apré sak i di, i avans pa byin konm k’i fo, pars bann gran péi, gran polyèr i vé pa fé sak i fodré fé. Zot na poin la volonté alé pli dovan dann la lite kont l’éshofmann klima.
Mi oi pa kisa va anpar azot !
Pars in bon koup de tan, in pé la fé konm si lo klima té i sar pa shofé, sansa zot i pans na poin aryin pou fé. Poitan, lé sir é sèrtin, sé bann z’aktivité imène la fote si problèm-la la aparète ; sirtou la goumantasyon bann gaz i fé l’éfé d’sèr. Partou la glas i fonn, partou nivo la mèr lé riskab monté. Bann-zil, sak lé pa déssi la ôter, lé riskab ète noiyé. Pa solman bann-zil, mé galman bann téritoir, dé foi bann gran téritoir lé ménasé. Byinsir, bann péi rish va trouv in manyèr pou ansort azot, mé la pa toulmoun lé rish déssi la tèr ; É sak lé pov ? Koman li va fé ? Va rode in plas pou sové ? Par santène milyon ? Mi oi pa kisa i sava anpar azot.
La politik l’otruch
Issi ossi, na d’moun an foutan. Konsèy réjyonal i doi okip problèm-la, i arsanm li s’anfout sa. La fé in séans travay, mé té mèm pa piblik, zournalis la mèm pa gingn lo droi assisté. L’Alyans té la, mé an parmi bann konséyé la majorité, l’avé zis inn-dé. I pé fé konmsa ! konm l’otruch i pé bour la tète dann trou galé an kroiyan lo shassèr i oir ar pa zot. Sansa i pé kroir, la mèr patri sar la pou anpar anou. Lé pa myé komans par fé sak ni gingn par nou mèm. Lé pa myé, pou komansé, kont déssi nout prop fors. Ète tète dir la zamé été in solisyon.
Tardra vyindra, sé nou, sansa nout zanfan épi nout ti zanfan lé riskab pèy sa !
Justin
