Oté

L’Étan Sin-Pol : Protèz la natir ? Dakor ! Mé l’moun alor ?

Justin / 11 zanvié 2012

Nana kant mèm drol z’afèr dann péi-la... nana inn-dé zour, bann plantèr l’Étan Sin-Pol la manifèst ankor in kou. Pou kosa d’apré zot ? Pars lé pi posib azot viv èk zot travay, vi k’zot bitasyon lé inondé. Ranpli èk dolo partou, an tou-tan ! Lo kanal i pèrmèt pa évakyé le lo an tro, é li ansèrv de riyin, vi k’li lé boushé konm madam Koko boushé, é pou évakyé le lo ? Kont pa dsi li ! Li évakyé près pa inn tyork.
Bann plantèr la parti adrès la méri, la préféktir, lo sèrvis l’anvironman... rien a fèr. Zot i di, partou la réponn azot, i fo atann moi d’juin pou déboush lo kanal. Sé konm si i di azot, alé baz dsi lo RSA épi fyé pa dsi zot kouraj pou viv épi fé viv zot famiy. Pou kosa atann moi d’juin, pars i fo atann la sézon bann zoizo, kisoi poul d’o, kisoi papang, kisoi d’ot ankor, la fine fé èk lo zot zèf. Pli pir, èk lo kanal boushé, i arsanm lo romèd banna la shoizi — déboush lo kanal arienk moi d’juin — lé pli pir ké lo maladi pars l’androi i fé lo ni lé inondé, é lé bien posib lo zèf i éklo pa. Armèt la dsi, na poin arienk zoizo, na tout sort zanimo. L’èr-la, lé riskab, plito ké sov la bio-divèrsité, i mèt aèl dann malizé.
Sa sé in n’afèr sèryé, mé demoun, koman zot i fé pou viv ? Inn la loué trèz l’éktar, nana uit lé sou d’lo. In n’ot la loué sink l’éktar, é tout lé sou d’lo. Total kapital, an parmi lo san-soisant-trèz l’éktar bon pou la kiltir, na san sou d’lo. Arzout èk sa, in pé lé an bou. Donk, konm moin la fine di, i fo trouv in bon l’ékilib rant prézèrv la natir épi prézèrv l’aktivité d’moun. Fransh vérité !

 Justin 


Kanalreunion.com