Oté

L’inbésilité sé sak lé lo myé partajé dsi la tèr !

Témoignages.re / 19 décembre 2014

Zot i koné Maurice la shanj gouvèrnman. Anerood Jugnauth avèk son koalisyon la gingn zéléksyon. Navin Ramgoolam la pèrd. Lé konmsa dann in démokrasi. Problèm solman kan ou la fé in kanpagn dsi lo shanjman… Pou nou rényoné sa i rapèl anou mové zafèr .Pou kosa ?

Pars dsi in kou d’dé d’zéléksyon nou la pèrd nout tram-trin, nout lotonomi énèrjétik la kil aryèr, nout mcur osi la pran l’fon… Donk sa i rapèl anou mové souvnir, mé ni pé dir la-ba shé nout bann kouzin demoun lé pli réalis, zot na poin bann réaksyon la flèr d’po. An in mo ni pé dir banna lé moin séktèr é moin kouyon ké nou, donk ni pé dir shanj gouvèrnman ok mé la pa inn rézon pou nou kroir i sava kass bann bon projé.

Poitan yèr moin la lir in zournal morisien é ala sak mi aprann : i paré lo nouvo gouvèrnman i sava arète lo projé d’métro léjé. Moin la lir sa dann in journal, la pa in gouvèrnman la souf sa dann mon trou d’zorèy donk la pa sir lé vré. Moin pèrsonèl mi atann oir lé shoz dann kèl sans zot va déviré… Mé si la kass lo métro ébin moin sar blijé majine laba banna lé pa pli malin ké nou isi.

Donk si sa lé vré, l’inbésilité konm di in gran saz, sé sak lé myé partajé dsi la tèr.

In kozman pou la rout : « Tyé kouyon pou pran son plas ! ».


Dizon sa i vé dir mèm shoz ké an o la. Sa i vé dir demoun lé pa dann l’obligasyon fé zafèr intélijan. Mèm lé pli fasil fé in kouyonad k’in n’afèr intélizan. Fèr in kouyonad ? Sé ékout bann kouyon ? Sé pa ansèrv son tète pou kalkilé, pou réflèshi. Zot osi fé travay zot koko, fé bouy zot matyèr griz, zot va konprann ké fèr in inbésilité, sa in n’afèr fasil pou fé.


Kanalreunion.com