Oté

L’informasyon ofisyèl : Bwana atitude, é Boy atitude ?

Justin / 20 novanm 2009

La pa pars ou na poin aryin pou dir ké ou i doi fèrm out také. Mi èm byin kozman-la, sirtou kant ou i antann in moun i parl gra dann in radyo pou dir, par ébzanp, bann politik i okip pa la késtyonn l’anvironman, la késtyonn l’anploi, brèf, toute bann késtyon demoun i poz, épi zot i gingn pa in bon, konm in mové répons...
Dann mon kèr, moin lété a d’mandé si boug-la té i sorte pa la planète Mars... sak moin lé sir, sé k’li lir pa “Témoignages”, li rogard pa télé lo zour bann sénatèr sansa bann dépité i poz késtyon lo gouvèrnman, li la pa parti non pli kKonsèy rézyonal ou byin Konsèy zénéral kan la diskite déssi lé z’Éta-zénéro pou l’Outro-mèr.
Lé vré, si bononm-la i kontant ali rogard zournal télé, moin lé prèské sir li pé pa konète vréman sak bann parti politik i fé, lo bann z’idé zot i défann... pou sak i défann vréman bann z’idé. Pars i pé pa dir bann télé i sava rode l’informasyon, ké zot i vé vréman zoué z’ot rol : inform demoun "onètman".
Mé, "onètman", mi kroi sa sé in gro mo pou zot ! Pars, dabor, i fo bayone parti kominis, évite donn la parol lo prézidan la Réjyon épi toute demoun i travay avèk l’Alyans... Pétète bann pli-o plassé la domann azot fé konmsa ? Pétète sa sé in l’ord lo gouvèrnan... li la di i fo fé konmsa... alor i fé konmsa ! Bon kèr, mové kèr, kontrékèr ? Sa ni koné pa, ni romark solman ké lé konmsa...
Sé konm k’i diré bann Bwana épi bann Boy : Bwana i komann é Boy i ékoute ! Bwana atitude é Boy atitude !

Justin


L’ésplikasyon inn-dé pti mo :

Fèrm son také : fèrm son boush

Parl gra : koz gra, konm in moun i koné !

Bayoné : mète in bayon dovan la boush

In gro mo : in zirman

Bwana épi Boy : lo mètr avèk lo sèrvitèr


Kanalreunion.com