Oté

L’informasyon sé in n’afèr tro sèryé pou konfyé sa bann z’informatèr profésyonèl !

Justin / 26 octob 2011

Yèr soir, moin la rogard in kou télé. Moin té i di dan mon kèr, avèk la Somèn kréol, sir-é-sèrtin, banna na do koi fé pète in z’afèr inportan. Zot i koné, la Somèn kréol sé in foi par an, i tonm a popré mèm péryod, donk na poin sirpriz. I pé pa di, sa la pran o-dépourvi ! Donk, moin la rouv mon télé, épi moin la asiz dovan, konm si moin té i atann in n’afèr inportan. Somèn kréol, sa in n’afèr lé inportan pou nou !

Lo prézantèr i komans par di bann titr. Ala k’i fé mor lo l’analozik, i arparl kadav Khadafi, i arparl ankor bann islamis la gingn z’éléksyon dann la Tinizi, patati é patata. Toudinkou, i anparl la Somèn kréol, mé pou poz késtyon dé-troi marmay pou domann azot kosa i vé dir ète Kréol. L’èr-la, mi komans nèrvé, pars moin té i pans noré fé koz bann Rényoné la travay tout in gran morso zot vi dési la lang épi la sivilizasyon kréol ; Moin té i kroi noré fé koz bann zarboutan la lang épi la kiltir kréol rényonèz. Alé oir la fé in spès radyo trotoir avèk trépé d’shoz dédan. Zot la pouss lo toupé ziska alé fé koz in pé marmay té i koné pa koz kréol ditou, sinonsa té apré gaskoné.

Lé vré, la lite pou lo kréol, lang konm sivilizasyon, la plipar d’tan té in n’afèr d’militan... té in n’afèr d’militan apré rézis kont l’alyénasyon ; Mé firamézir kant mèm, moin té i kroi bann z’informatèr profésyonèl l’avé shanj manyèr, l’avé komans par konmprann la natir nout konba épi lo gran l’éspoir sa la mète dann kèr Kréol rényoné... Zordi, mi oi moin la tronpé. Zordi, mi domann amoin bien si l’informasyon ofisyèl i baz pa dési in sinp z’afèr : rash dan nout kèr nout kiltir kréol, vide l’intéryèr nout tète pou ar-ranpli arienk avèk la sou-kiltir fransèz, alyène anou tanpir k’i pé.

Na in boug té i apèl Clemenceau té i di konmsa : « La guèr sé in n’afèr tro sèryé pou konfyé sa bann militèr ! ». Moin lé a dmandé si l’informasyon osi la pa in n’afèr tro sèryé pou konfyé sa bann z’informatèr profésyonèl.

NB : Mi di pa bann télé i sava pa fèr ziska samdi, sansa dimansh, in bon n’afèr dési la Somèn kréol, mé lindi lété mol. Kan i komans mal, souvan dé foi, i fini pa bien.

 Justin 


Kanalreunion.com