Oté

« L’intélizans lé borné avèk la kouyonis ! »-In kozman pou la rout

Justin / 26 out 2015

Sa in drol kozman ! Mé konm moin la fine dir nana in l’opozisyon rant lo mo promyé bout é lo mo dézyèm bout : in koté nana « l’intélizans » l’ot koté nana « la kouyonis », son kontrèr.

Son kontrèr ? moin lé pa si sir ké sa ! Pars i di inn lé borné avèk l’ot, konm k’i diré dé voizin. Koman zot i pé ète voizin é an mèm tan opozé inn par raport a l’ot ? Sanm pou moin nana plizyèr ka : na lo ka in moun i pans li lé intélizan, son bann z’aksyon lé intélizan alé oir sé lo kontrèr dann inn é l’ot ka.

Nana in dézyèm ka : kan ou i konpran pa sak in moun i di épi i fé, ou na tandans a kroir sé lo moun ké lé kouyon, alé oir sé ou. Nana ankor la késtyonn l’intélizans avèk l’instriksyon : in moun instruyé i pé konport ali dan la vi konm in inbésil.

Kosa zot i anpans ? Arien ditou ! Fé travay z’ot koko ! Fé bouy z’ot matyèr griz ! zot va oir ké rant-rant ni pé z’ète dakor rantre nou !


Kanalreunion.com