Oté

L’intéré zénéral sakrifié dsi l’otèl z’éléksion

Justin / 29 décembre 2012

Dèrnié foi moin la ékri, i fé pa ninport kosa ninport ousa dsi nout bor d’mèr. Pars lo rézilta, souvan-défoi, la pa sak ou i atann, souvan-défoi, sé lo kontrèr k’i ariv. I fo dir, la pa fasil prann in désizion, sirtou kan in bann aboiyèr d’nuit lé la pou anpèsh aou travay rézonableman. Pou kosa mi di sa ? Pars kou dsi kou, la komine Sin-Pol i sort anons dé nouvèl.

Inn, dan son plan kont danzé rokin. I sava mèt bann vijil dan la mèr dann Rosh Noir, pétèt osi dann Boukan Kanot. Nora dé l’ékip èk palm, tiba, konbinézon épi fiziy sou-marine. Zot rol ? Fé pèr rokin, konm sa bann sèrfèr, bann plonzèr, bann bénièr... va fé zot éspor — sansa zot biznès — san k’rokin shagrin i atak azot. Biznès la mèr i pé èt kontan ! Mé konbien sa i sava kouté ? Moin la pa vi lo shif. Kisa i sava pèy sa ? Sirman bann moun i pèy l’inpo. Donk, a suiv ! Mé pétèt lo bi dan l’afèr, sé ariv an bon pozision pou z’éléksion.

Dézièm z’afèr ? La désid fé in réparasion provizoir la dig Rosh Noir, avan fé lo réparasion définitiv. La désid mèt 150.000 éro la-dan. La pa in éro ! Sa i trouv pa dsou la pat shoval, mé sirtou, sé in n’afèr lé pa fé pou diré, é i koné pa koman li va rézisté si na mové tan. Mové tan ? I tonm bien, vi ksé zis la sézon. Alor ? Lé a suiv osi. Mé pou fé lo provizoir, i sava pran sab blan dsi la plaz Brizan, pou dépoz bann kap dosi. Sa la mèt sé pa konbienn tan pou antasé tèr-la. Ala i pran lo risk déstabiliz in plaj, déstabiliz in bor d’mèr. Ankor in foi, ninport kosa, ninport ousa dsi bor d’mèr La Rénion ! Ki vivra véra.

Zis in romark : kan bann z’élu Sin-Pol té dann Parti kominis, zot té i fé pa ninport koué, pars té sir zot bann kamarad nora pa mank di azot zot dé mo, épi zot té i pé fouy dan la baz réfléksion lo parti la antasé dopi k’li égzis. Zordi, i anvoiy tousala dingué avèk in risk san kalkilé. Zordi, shomin lé ouvèr. Na poin arien pou mèt in pé lo frin. Kozé la shanjé ! Lo z’aksion la shanjé galman ! Kan mèm, i sakrifié pa l’intéré in péi dsi l’otèl z’éléksion.

NB : M’a arzout èk sa in pti kozman moin la tir dann in zournal pou marmay... Kan moin lété pti, moin té i lir zournal "Vaillant". Aprésa moin la lir “Pif lo shien” : zournal bien intérésan. La-dan l’avé band désiné avèk tout kouyonad demoun i pé fé, mèm si té i mèt an sèn bann z’animo... Mi souvien, lo shat Hercule la fé in mur épi, zis kan lété fini, lo mur la dégréné in kou, pars li té fé sa èk in drol mortié : do sab avèk dolo moitié-moitié. Rézilta, lété a prévoir !

Justin


Kanalreunion.com