Oté

L’inyon éropéène ? Ala in drol dé démokrasi kant mèm !

Justin / 27 zwin 2016

Nout tout i koné rézilta lo référandome dann la Grann-Brétagn : banna la désid vot pou lo bréksit. Sa i vé dir : « Baye ! Baye ! L’érop : ni artrouv ! ». L’èr-la, toulmoun i di péi-la la touzour mète in pyé an déor l’érop é in pyé anndan. Li lé anndan kan na pou gagné, li lé déor kan na poin pou gagné. Romark, la pa son fote si lé z’ot péi i karès ali, konm i karès in shat mové karaktèr, vilin manyèr, é konm k’i diré sé in l’anvoiyé bann z’amérikin. Sa sé sak demoun i di ! Alor mi vann azot sa konm moin l’ashté.

Sak mi romark sé ké gouvèrnman péi – la, dopi madam Thatshèr, an passan par Tony Blèr é ziska lo Cameron zordi la touzour fé in politik iltra-libéral é li la touzour domann lé z’ot pou amenn in politik konmsa. Li té kont la pac -politik agrikol komine - li té i vé pa bann kota. Sé in pé par li mèm ké nout bann plantèr lé riskab ète ruiné. Par li é par tout sak i suiv ali dann kouran iltra-libéral. Si tèlman ké lé z’ot l’avé poin arien pou rofiz ali : la p’asé, mète ankor !

Ala zordi ké li sort dann l’inyon éropéène é konm in prétansyé, sé li k’i di ké li va komans négosyé son sorti moi d’oktob. Akoz moi d’oktob solman ? Akoz pa tout suit ? Li la fine fé son votaz, astèr i fo tir lo konklizyon… In sinp romark kant mèm : i parétré ké si i fé vote bann péi l’inyon éropéène noré plis la mazorité k’i désidré d’ shapé. Bou di kont, ala in drol dé démokrasi kant mèm ! K’i obliz la mazorité d’moun rès dann in l’inyon ké zot i vé pa pou vréman.


Kanalreunion.com