Oté

L’inyon la Droite la kass par boute... la fé pti

Justin / 15 févrié 2010

Nana in pé d’tan, bann zournal la Droite la di Didier Robert sé l’onm ki monte, pars li la nyabou fé l’inyon la Droite... é té pou sa ké lo promyé minist épi lo prézidan la Répiblik la déside fé in tourné-viré avèk lo "zoli garson". RFO la bate la min, la pran son parti… tazantan la fé koz lo roi martin Sintandré, tazantan l’onm providansyèl par li-mèm. Antène Rényon ossi la fé sa, mé in pé plis an misouk. Parl pi bann radyo, sak i fé koméraz pintade.
Fransh vérité, toute bann z’inyonis té i sava kalbite l’Alyans, fé mord sa la pousyèr, asir la-dsi, vèy pa koman, kraz sa konm i kraz in kankrola… pèf ! Donkalor, toute té i roul ron… toute ? Sof ké, konm k’i diré in pé, té dir pou l’akoushman la list… lété pa si fasil ké sa... té i éspas konm in parti d’kart frodé par avans. Mé sak i bate dé bèr i lèsh son doi, é d’apré sak i paré, lété lo joli garson k’té i bate dé bèr, é Paris té i done in pé la min.
Zot i koné kossa k’i éspas kan i zoué volèr dann kart ? Batay i pète, sa lé pliské sir... é sak i dévé arivé l’arivé. Afors alé a lo, kalbass i kass. La, la fé zéklèr-la ! Dann télé, moin té i kroi ziska lo roi martin té i sava gingn in kardyak dann son dérapaz vèrbal pa tro kontrolé. Bin lo l’inyon la-dan ? Konm di Kréol, i diré la kass par boute, i diré li la fé pti.

Justin


Kanalreunion.com