Oté

L’ONU i lans lo promyé partenarya global pou promouvoir droi peup otoktone

Justin / 26 mé 2011

Dopi lo 20 mé sèt ané, l’ONU la lans lo Partenarya Nasyon-Zuni-Peup otoktone. Dapré zot pou kosa i fé sa ? Na plizyèr rézon : pou garanti zot droi — peup otoktone —, pou ranfrors zot linstitisyon, pou in méyèr roprézantasyon dan la gouvèrnans, pou osi in méyèr roprézantasyon dan prosésis désizyonèl lokal é natyonal — sa i kompran prévansyon konfli i konsèrn la tèr zansèt é lisaj resours natirèl. Na in bon pé kominoté indijèn i rogard lindistri lèstraksyon èsploit zot tèr èk lo rosours. Ban’d zèsploitèr, lé pa la avèk droi peup indijèn. Kom i di : zot i pyétine. Mé dorénava atansyon pangar, l’ONU i vèy.

Zot i koné peup otoktone lé viktim linzistis istorik. Dopi tro lontan, zot i souf la povreté, la diskriminasyon. Zot lé privé rokour jiridik. Donk, zot i viv an marj la sosyété. Zot na in féb nivo lédukasyon, zot na grav problèm santé, èksétéra.

Projé l’ONU va répar tou sa. Zot i fé pa sa tou sèl. I fé èk zéta. Nora la formasyon, promosyon dyalog, révisyon é réform la loi, prévansyon konfli, va mèt an plas prosésus konsiltatif.

Kom zot la kompri — é mèm si zot la soufèr —, peup otoktone lé inportan, sé in richès pou limanité, zot na in kiltir ki fo prézèrvé é transmèt.

L’ONU èk tout lantouraj, chapo pou sak zot i fé. Zot i koné sa i konsèrn a nou osi !

Justin 


Kanalreunion.com