Oté

L’orgèy, sa lé mol sa ! Mi pans mèm sa la pa bon ditou !

Justin / 23 févrié 2012

Nana d’moun, ou i vé, ou i vé pa, mé ou nana l’admirasyon pou zot. Dan nout parti, moin na l’admirasyon pou bann militan i amèn dopi lontan in bann konba k’i vo la pèn, in bann konba difisil la plipar d’tan. San mantir, Huguette Bello i fé parti bann militan moin nana l’admirasyon pou èl. Biensir, ou i admir, mé kan la pèrsone, sanm pou ou, i dérap, ou i pé pa aprouv son dérapaz, ou i pé pa kontinyé aprouv ali konm ou té aprouv avansa... zot i koné, nana lo moun valab dan nout parti.

Sak lé vivan zordi, épi sak la fine alé l’ot koté, mé zot la sakrifyé zot vi pèrsonèl pou zot parti, pou zot pèp, pars pou zot, inn é l’ot sé la mèm shoz. Pou mon par, pars dan fon mon kèr, mi rogrèt pa an avoir fé plis pou mon péi ; donk, sak la fé pliské moin, lé normal mi bat la min pou zot. Pétèt galman pars mon shoviy la obli grosi, é konm mon famiy la di amoin i fo rès modèst, bin mi rès modèst. Mé sak i vien pa bou rès modèst, in l’èr zot i pans zot na rézon san pour san é lé zot na tor. L’èr-la, zot lé dann shomin l’érèr.

Pou rovnir dési la késtyonn Huguette, m’a dir azot pou kosa mi éstim zordi èl i dérap. Si ou lé dan lo parti é si ou la bézoin lo parti i èd aou, ou i domann, é si bann militan i pans i fo èd aou, zot i èd aou. Lo parti i èd aou ! Mé si, so foi isi, sé lo parti i domann aou èd ali, sansa si dann in konba la bézoin ou i done in kou d’min... l’èr-la, si ou i done pa li lo kou d’min li la bézoin, alor lé pa bien, alor ou i dérap, é mon l’éstime pou ou i diminyé, san obli lo bann konba ou la améné dépi lontan.

Dimansh, Elie Hoareau, nout sokrétèr zénéral, la domann Huguette alé amèn in konba dann sétyèm sirkonskripsyon. Tout militan i pans èl i pé gingn la viktoir dann sétyèm. Tout i pans èl nana mèm shans ké lo mèr Sin-Lé, pétèt in bout anplis. Mé son l’orgèy la domine aèl. L’orgèy, sa la pa in bon n’afèr, la pa in bon konséyèr, pars li fé obli aou out parti, out pèp. Boudikont, sanm pou moin, ou i fini par pans aou solman. Sa lé mol, sa la pa bon ditou sa !

 Justin 


Kanalreunion.com