Oté

« L’otèl i arfiz pa gourman » - in kozman pou la rout

Justin / 15 octob 2015

Pou bann kréol lontan, l’otèl té in l’androi demoun téi sava manjé. Pétète koméla noré di réstoran mé dann tan demoun téi tiliz lo mo l’otèl. L’otèl zariko, sé lo nom la prizon pars manzé lé pa tro varyé dé foi li lé mèm avaryé. Si ni tienbo kont de sa, ni oi toutsuit lo sans prop. Mé lo sans figiré sé koué ? Boudikont mi pans sa i pé z’ète in l’androi piblik sansa in l’androi ou i sava trouv kékshoz k’i ral aou. In zour mi di mon kamarad konbien plas nana pou nout group dann in rényon, li fé amoin pou répons lo nonm la pa limité épi li armète la dsi : « L’otèl i arfiz pa gourman ! »… I tonm bien pars moin lé gourmann konète lé shoz.

Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir ké, rant-rant, ni pé z’ète, tazantan, dakor rantre nou.


Kanalreunion.com