Oté

L’otonomi énèrzétik ?
In klé pou nout l’avnir !

Justin / 27 mars 2012

Dimansh, moin la parti rényon Mélenchon. Noré z’afèr pou dir, si tan tèlman la-ba, bononm-la la pa koz la boush ouvèr. Tout sak li la di l’avé in sans, é sé in bon n’afèr pou in moun konm moin, pou d’ot osi, mi pans. Mé mi vé parl in n’afèr la bien intérès amoin. Mi vé parl l’otonomi dann l’énèrji. Sa la pa in n’afèr étranj pou nou, ni vé, ni vé pa, i fo ni pas par-la. Sak lé étranj sé k’in n’afèr, konm in pé i di "in konsèpt", nou la fé, nou mèm ni oi pa tro koman sa lé inportan. Pou Mélenchon, sa sé in n’afèr plis k’inportan.
Pou kosa ? Pars solon sak li di, si sé pou trouv in bon solisyon problèm l’énèrji, lé déja bien, pars l’énèrji nana pou nou, konm pou tout demoun, pou nout péi konm pou tout péi, sa sé in késtyon vital. Mé la pa arienk sa, pars sa lé inportan pou la roshèrch, donk in manyèr mèt an valèr é mèt anlèr nout patrimoine kiltirèl. Arzout èk sa, si ni fabrik par nou mèm bann zoutiy l’otonomi énèrjétik, sa i amèn anou dann shomin nout dévlopman dirab. Mi arèt la, mé zot i konpran pou kosa son réflèksyon sa i kont pou nou, fé in l’avnir pou nou épi nout bann zanfan. L’èr-la, mi di dann mon kèr, pou kosa in moun i sort déor li konpran toutsuit koman in konsèpt nou la fé lé inportan pou nou.
Pa solman ! Pou l’imanité. Alé oir, nou isi ni konpran pa sa. Sanm pou moin, ni konpran pa pars sansa moin lé sir nou té fine angaj in gran konba pou so l’otonomi énèrjétik. Mi vé pa parl pou lé zot ; Mi vé pa parl pou lé zot parti. Mi vé parl pou nout Parti kominis, pars lé rogrétan dir, mé moin lé sir in bonpé parmi nout bann kamarad i konpran sa bien, mé na in bonpé galman i sousyé pa d’sa… i trouv nana dé shoz pli inportan. Eskiz amoin si mi di sa, mé na in pé galman i s’anfoutsa. Alor, lé ga, dalon, dalone, la rofondasyon nout parti i pas galman par la. I fo nou lé sir ké program nout parti sa lé séryé, sa lé bon pou nou, sa lé bon pou l’avnir nout péi.
In poin pou fini : Mélenchon la di konmsa : li la pran l’idé l’otonomi énèrjétik, é li ma mèt sa dan son program pou bann réjyon épi bann départman la Frans. Bin nou alor ? In l’idé nout parti inportan konmsa, sa i doi zèt in klé pou nout konba, in klé pou nout l’avnir.

Justin


Kanalreunion.com